National

Lahore Mein Mosla Dhaar Barish Ke Baais Nizaam Zindagi Darham Barham

 Lahore: Lahore Ke Mukhtalif Elaqon Mein Mosla Dhaar Barish Ke Baais Nizaam Zindagi Darham Barham Hokar Reh Gaya Jab Ke Kayi Elaqay Bijli Se Mahroom Hogaye.

Report ke mutabiq Lahore ke mukhtalif elaqon mein 15 ghantay se zayed jari rehne wali mosla dhaar barish ke baais roads talaab ka manzar paish karne lage jab ke nizaam zindagi maflooj hokar reh gaya.

Shadeed barish ke baais bijli ka nizaam bhi darham barham hokar reh gaya aur 122 fider bhi trip kar gaye jis ke nateejay mein mutadid elaqay bijli se mahroom hogaye.

Barish se mutasira elaqon mein Kot Lakhpat. Firozpor Road. Ichra. Samanabad. Muslim Town. Qazafi Stadium. Johar Town. ganga raam aur deegar shaamil hain.

Jab ke rescue zaraye ke mutabiq Raiwind road par taiz barish ke baais imarat ki chhat girnay se 5 afraad zakhmi bhi huye.

Doosri janib tofani barish ke baais Islamabad se Lahore pounchanay wali parwaaz ko wapis bhijwa diya gaya jab ke PIA ki parwaaz PK 653 Lahore poanch gayi thi jisay airport par utrney ki ijazat na mili.

Isi terha barish ke baais airport ke dono fider band hogaye jis ke fori baad airport per operation jari rakhnay ke liye generator on kar diye gaye.

Mehakma mosmiyat ke mutabiq shehar mein 74 mili meter barish ho chuki hai aur ainda 24 ghantay ke douran waqfay waqfay se barish ka silsila jari rahega jab ke sirf airport par 100 mili meter barish record ki gayi hai..

Karachi Ke Mukhtalif Elaqon Mein Shadeed Garmi Ke Baad Taiz Hawa Ke Sath Barish

 Karachi: Shehar-E-Quaid Ke Mukhtalif Elaqon Mein Halki Barish Ne Jahan Kayi Dinon Se Jari Garmi Ki Lehar Ka Khatma Kar Diya Hai Wahein Shehrion Ke Chehray Bhi Khushi Se Khil Utthay Hain.

Karachi mein guzishta kuch roz se jari shadeed garmi ki lehar Aaj ke din bhi barqarar rahi aur darja hararat 38 degree centi grade record kiya gaya lekin Heat Index bharne ki wajah se is ki shiddat 40 degree tak mehsoos ki gayi.

Din ke waqt qudrat ko Karachi walon ki halat par reham Aa hi gaya aur mausam batadreej badalna shuru howa.

Pehlay gird alood hawa chali aur phir mausam abar alood howa kuch hi der baad Gulshan Hadid. Steel Town. Malir. North Karachi. Gulsitan e Johar. FB Area aur super high way Gulshan e Maymar tak halki barish hui hai.

Barish ke sath hi kayi elaqon ki bijli munqata hogayi hai.

Mehakma mosmiyat ka kehna hai ke samandari hawaon ne aik martaba phir shehar ka rukh kar liya hai jis ki wajah se shaam tak shehar bhar mein taiz hawaon ke sath halki barish ho sakti hai..

Karachi Mein Qayamat Kheiz Garmi Ne 3 Afraad Ki Jaan Leli

 Karachi: Shehar-E-Quaid Mein Jari Garmi Ki Shadeed Lehar Ne 3 Afraad Ki Jaan Leli Hai Jab Ke Kayi Afraad Mukhtalif Sarkari O Niji Hospitals Mein Daakhil Hain.

Karachi mein ek martaba phir Sooraj aag barsane laga hai aur darja hararat 43 digree centi grade se tajawaz krgya hai.

Shadeed garmi ki wajah se Liyari general hospital mein bihar colony ka azeem chal basa jab ke bufar zone sector 16A mein hate stroke se 1 shakhs intiqaal kar gaya.

Orangi mein qasba mourr ke qareeb 33 sala Younus achanak sarrak par gira aur uska Damm nikal gaya is ke elawa shehar ke mukhtalif sarkari o niji hospitals mein darjanon mareez zair e ilaaj hain.

Sobai Wazeer E Sahet Jaam Mehtaab Dahar ka kehna hai ke garmi ki wajah se mutasireen ko bar waqat tibbi imdaad pohanchanay ke liye mehakma sahet ne shehar ke tamam sarkari hospitals mein emergency nafiz karte hue tibbi amlay ki chuttiyan mansookh kardi hain.

Is ke ilawa hukoomat ne K-Electric ko bhi load shedding na karne ki darkhwast ki hai.

Tibbi mahireen ka kehna hai ke shadeed garmi ke asraat zael karne ke liye log pani aur deegar thanday mashrobat ka ziyada se ziyada istemaal karen aur kisi zaroorat ke baghair ghar se bahar na niklen.

DG Mehakma Mosmiyat Dr. Ghulam Rasool ka kehna hai ke is waqt hawa ka kam dabao bahera arab mein mojood hai jis ki wajah se shehar mein samandari hawaien band hain.

Shehar ko Sindh aur Balochistan ke medani ilaqon ki garam hawaon ne apni lapait mein le rakha hai.

Shadeed garmi ki lehar sunday aur monday ko bhi jari rahegi taham monday ki raat se darja hararat mamool par aajyega.

Wazeh rahay ke June mein Karachi mein shadeed garmi ke natijay mein 1800 se zayed afraad jaan bahaq hogaye thy..

Interior Ministry Ne Eid-Ul-Adha Ke Mauqe Par 4 Chttiyon Ki Sifarish Kardi

 Islamabad: Interior Ministry Ne Eid-Ul-Adha Ke Mauqe Par 24 Se 27 September Tak Tatilaat Ki Sifarish Kardi.

Mulk bhar mein Eid ul Adha 25 September Friday ko hogi jis ke paish e nazar Federal Ministry of Interior ne 4 tatilat ki sifarish ki hai.

Interior Ministry ki janib se Eid ul-adha ke mauqe par 24 September Thursday se 27 September Sunday tak tatilat ki sifarish ki gayi hai jin mein government employees aur Scheduled banks ki hafta waar 2 chuttiyan bhi shaamil hain..

Multan Mein Vihari Chowk Par Dhamaka

 Multan: Vihari Chowk Mein Bus Stand Ke Qareeb Dhamakay Ke Natijay Mein 10 Afraad Jaan Bahaq Aur 60 Zakhmi Hogaye Hain Jab Ke Wazeer E Aala Punjab Shahbaz Shareef Ne Waqeye Par Muzammat Ka Izhaar Karte Hue Intizamia Aur Police Se Report Talab Karli Aur Mutasireen Ke Liye Imdaad Ka Elaan Bhi Kiya.

Report ke mutabiq general bus stand Multan ke qareeb intehai ghunjaan jaga vihari chowk par khofnaak dhamakay ke nateeje mein 10 afraad jaan bahaq jabkay 60 ke qareeb zakhmi hogaye hain.
Dhamakay ki aawaz 4 kilometer door tak suni gai aur qareebi buildings ke dar-o-deewar hil gaye aur sheeshay toot gaye.

Aeni shahideen ke mutabiq dhamakay ke baad aag ka aik gola aasman ki taraf utha aur aasman taiz neela hogaya aur har taraf insani auza bikhar gaye.

Jub kay kuch afraad kayi foot tak uchlay aur qareeb khari aur guzarnay wali gariyon mein aag lag gayi qareebi shops tabah ho gain aur har taraf aah o baka aur cheekh o pukaar ke manazair they.

Dhamakay ke fori baad logon ne apni madad aap ke tehat zakhmion ko uthana shuru kiya jis ke chand lamhoon baad resque hakkam aur Ambulance bhi poanch gayeen aur imdadi karwaiyan shuru kar dein..

Baani Pakistan Quied Azam Mohammad Ali jinnah Ka Yom-E-Wafaat

 Karachi Lahore: Babaye Qoum Quaid-E-Azam Mohammad Ali jinnah Ka 67th Yom E Wafaat Mulk Bhar Mein Aqeedat O Ahtiram Se Manaya Ja Raha Hai.

Baani Pakistan ke yom e wafaat per karachi samait mulk bhar mein taqrebaat ka ahtimam kiya jayega.

Quaid-E-Azam ki rooh ko aisaal e sawab ke liye Fatiha khawani ki jaye gi.

Quaid-E-Azam ke yom e wafaat par Governor Sindh Dr. Ishrat Ul Ebad Khan, Wazeer e aala Sindh Syed Qaim Ali Shah aur ssobai kabeena ke arkaan ne baani Pakistan ke Mazaar per haazri di.

Aur phoolon ki chadar charhai Fatiha khawani bhi ki.

Quaid-E-Azam Mohammad Ali jinnah ke yom e wafaat ki nisbat se shehrion ki ek bari tadaad bhi mazaare quaid par hazri degi aur Fatiha khawani keregi.

Supreme Court Ka Urdu Ko Daftari Zabaan Ke Tor Par Raij Karne Ka Hukum

 Islamabad : Supreme Court Ne Aaien Ke Article 251 Ke Tehat Urdu Ko Daftari Zabaan Ke Tor Par Raij Karne Ka Hukum De Diya.

Cheif justice of Pakistan justice Jawad S khwaja ki sarbarahi mein Supreme Court ke 3 rukni bench ne urdu ko sarkari aur daftari zabaan ke tor par raij karne se mutaliq faislay ki samaat ki.

Supreme Court ne apne faislay mein urdu zabaan ko raij karne se mutaliq 9 Hidayat jari karte hue kaha gaya hai ke Aaien ka itlaq hum sab ka farz hai.

Aaien mein darj hai ke 15 saal ke andar angrezi ki jaga urdu ko sarkari aur daftari zabaan ke tor par raij kiya jaye ga.

Aaien ke article 251 ke tehat urdu ko fori tor par daftari zabaan ke tor par nafiz kiya jaye. Wafaqi satah par muqablay ke imtehanaat mein qaumi zabaan istemaal ki jaye.

Supreme Court ne apne tafseeli faislay mein kaha hai ke tamam idaron mein article 251 ka nifaz yakeeni banaya jaye.

Qaumi zabaan ke rasam alkhat mein yaksaniyat ke liye hakoomaten hum ahangi peda karen teen mah ke andar hakoomaten qawaneen ka urdu zabaan mein tarjuma karen.

Adalti muqadmaat mein mehakmay apne jawabaat mumkina had tak urdu mein paish karen.

Awaami mafaad se mutaliq adalti faislon ko bhi urdu mein tarjuma kiya jaye.
Adalti faislay par amal-dar-aamad ke liye har shakhs qanooni chara joi ka haq rakhta hai.

Wazeh rahay ke kokab Iqbal aur Mahmood Akhtar Naqvi ki janib se allag allag darkhwasten dair ki gayi theen jin mein adalat Uzma se istada ki gayi thi ke Aaien ke article 251 ke tehat urdu ko sarkari aur daftari zabaan ke tor par raij karaya jaye.

Adalat Uzma ne 26 Augst ko samaat mukammal karte hue faisla mehfooz kar liya tha..

Yom-e-Difaa Ke Mauqe Par Motocycle Ki Double Sawari Par 2 Roz Ki Pabandi

 Karachi Mein Yom-e-Difaa Ke Mauqe Par Motocycle Ki Double Sawari Par 2 Roz Ke Liye Pabandi Aaid Kardi Gayi Hai.

Karachi: Mehakma Dakhla Sindh ki janib se motocycle ki double sawari par 2 roz ke liye pabandi aed kardi gayi hai.

Police hakkaam ka kehna hai double sawari par pabandi Yom-e-Difaa ke mauqe par security khadshaat ko mad e nazar rakhtay hue lagai gayi hai.

Hakkaam ki janib se police ko mushtaba afraad ki kari nigrani ka bhi kaha gaya hai.
Double sawari ki khilaaf warzi karne walay afraad ke khilaaf muqadma darj kiya jayega..

Mulk Bhar Mein 69th Yom-e-Azadi Intehai Josh-o-Jazbay Ke Sath Manaya Ja Raha Hai

 Mulk Bhar Mein Yom-e-Azadi Intehai Josh-o-Jazbay Ke Sath Manaya Ja Raha Hai Jab Ke Is Mauqe Par Raat 12 Bajtay Hi Karachi, Lahore, Islamabad Aur Queta Sameit Deegar Shehron Mein Shandaar Aatish Baazi Ka Muzahira Kiya Gaya.

Mulk bhar mein 69th Yom e Azaadi Shayan shaan tareeqay se manaya ja raha hai.

Din ka Aaghaz Wifaqi Dar-al-hakoomat mein 31 jab ke Sobai Dar-al-hakoomaton mein 21,21 Topon ki Salami se howa jab ke masajid mein Pakistan ki taraqqi aur khushhali ke liye khusoosi duayen ki gayeen.

Jashan e Azaadi ki markazi taqreeb Islamabad ke convention center mein ho rahi hai jis mein Saddar Mamnon Hussain, wazeer e Azam Nawaz Shareef, Army Cheif General Raheel Shareef aur joint Cheif Of Staff Committee General Arshad Mahmood sameit wifaqi wazraa, mimbraan qaumi assembly, senetors aur ghair mulki sfartkaron ki barri tadaad shareek hai.

Taqreeb ka baqaida aaghaz saddar Mamnon Hussain aur wazeer e azam Nawaz shareef ne parcham kushai se kya.

Yom e Azaadi ki markazi taqreeb ke mauqe par Islamabad mein security ke intahi sakht intizamaat kiye gay hain,

Wifaqi dar-al-hakoomat ki eham shahrahon par pak fouj ke dastay tainaat hain jab ke mobile phone service bhi moattal hai.

Karachi mein bhi Mazaar e Quied par guards ki tabdeeli ki purwaqar taqreeb munaqqid hui.

Mazaar e Quied par Governor Sindh Dr.Ishrat ul Ibad Khan, Wazeer e Aala Sindh Syed Qaim Ali Shah sameit mimbraan Sindh assembly ne shirkat kar ke Fatiha khawani ki aur phoolon ki chadar charhai.

Lahore mein bhi Wazeer e Aala Punjab Shahbaz shareef ne Mazaar e Iqbal par haazri di aur parcham kushai ki.

Wazeer e Aala Balochistan Dr. Abdul Malik ne bhi sobai assembly mein parcham kushai ki.

Shumali Waziristan ki tehseel miranshah mein bhi muqami afraad ne Pak Fouj ke jawanon ke sath Qaumi Naghmon par jhoom utthay jab ke Azad Kashmir ke saddar Sardar Yaqoob ne bhi ewaan e saddar mein Sabz Hilali parcham Lahraya.

Yom e Azaadi ke mauqe par gali gali koochy koochy mein azaadi ke jazbay se sarshar shehrion ne cheraghan kiya aur Qoumi Parcham se apne gharon ko sajaya jab ke 13 August ki raat 12 bajtay hi Karachi, Lahore, Queta aur Islamabad sameit deegar shehron mein shandaar aatish baazi ka muzahira kiya gaya aur is mauqe par Aasman roshiniyon se Munawar hogaya,

Mulk ke mukhtalif hisson mein Jashan e Azaadi ki munasbat se programme ka ineqad kiya gaya hai jis mein Bachay, Nojawan, Buzurg sab hi  ne mili Naghmon par Raqs kiya.

Yom e Azaadi ke mauqe par Karachi sameit deegar shehron mein Manchaly Nojawan raat ko sarkon par nikal aye aur yom e azaadi ka jashan manaya.

Dosri janib wazeer e azam Nawaz Sharif ne yom e azaadi ke mauqe par qoum ke naam apne pegham mein kaha hai Ke ye din khushi ka bhi hai.

Allah Taala ke huzoor sajda shkar baja laane aur is ehad ko taaza karne ka bhi ke hum muttahid aur yakjaan hokar un maqasid ke liye jadd-o-jehad krte rahenge jin ke liye pakstan haasil kiya gaya tha.

Unhon ne kaha ye shayar mashriq Allama Iqbal ne janoobi Asia ke musalmanoon ke liye ek azad o khud mukhtar riyasat ka khawab dekha hai babaye qoum Quaid E Azam Mohammad Ali Jinnah ne wal’walah angaiz tehreek ke zariye is khawab ko tabeer ki shakal di hai..

Punjab Aur Khyber Pakhtun Khwa Ke Mukhtalif Shehron Mein Zalzalay Ke Jhatkay

 Islamabad: Punjab, Khyber Pakhtun Khwa Aur Kashmir Ke Mukhtalif Shehron Mein Zalzalay Ke Shadeed Jhatkay Mehsoos Kiye Gaye Jis Ke Baa’is Logon Mein Shadeed Khauf o Hiraas Phail Gaya Jab Ke Richter Scale Par Zalzalay Ki Shiddat 6.7 Record Ki Gayi.

Report ke mutabiq Islamabad, Lahore aur Peshawar samait mulk ke balai elaqon mein zalzalay ke shadeed jhatkay mehsoos kiye gaye jis ke baad log kalma tayyiba ka wird karte gharon se bahar nikal aaye.

Jin shehron mein zalzalay ke jhatkay mehsoos kiye gaye un mein Islamabad, Lahore, Faisalabad, Muzaffarabad, Sargodha, Boray wala, Sialkot, Gujranwala, Bahawalnagar, vharhi, Nankana sahib shaamil hain jab ke khyber pakhtun khwa ke shehar Peshawar, Mardan, Para chanar, Abbotabad, Hari poor, Mansehra, Battagram, Besham, Ghizer, Lower deer samait Gilgit, Skardu, Chitral mein bhi zalzalay ke jhatkay mehsoos kiye gaye.

Isi terha khyber agency aur is ke mulhiqa elaqon samait Azad Kashmir ke mukhtalif shehron aur Sri nagar mein bhi shehrion ne zalzalay ke jhatkay mehsoos kiye.

Zalzala pema markaz ke mutabiq richter scale par zalzalay ki shiddat 6.7 record ki gayi jab ke zalzalay ki geherai 200 kilometer aur markaz Afghanistan tajkstan border tha, mulk ke mukhtalif shehron mein zalzalay ke jhatkay 30 second tak mehsoos kiye gaye..

News
Karachi
September 2017
M T W T F S S
« Mar    
 123
45678910
11121314151617
18192021222324
252627282930