National

Abbottabad Mein 5.1 Shiddat Ka Zalzala

 Islamabad: Wafaqi Dar-Ul-Hakoomat Islamabad Se 50 Kilometer Door Abbottabad Mein 5.1 Shiddat Ke Zalzalay Ke Nateejay Mein 3 Aafraad Halaak Hogaye Hain.

Khabar rasan idaray AFP ke mutabiq American jolujekyll surway ka kehna hai ke zalzalay ka maqam Islamabad ke shumal mein 15 kilometer door pahari silsila tha jis ki gehrai 26 kilometer thi.

Pakistani hakkaam ke mutabiq zalzalay ke baais 2 khawateen sameit 1 bacha halaak hogaya hai.

Senior police Afsar (SPO) Sher Akbar Khan ne bataya hai ke Abbottabad shehar ke muzafaat mein qaim matti ke ghar zalzalay ke baais dhair hogaye hain jis ke nateejay mein 2 khawateen aur 1 bacha halaak jab kay 1 bachi zakhmi hogayi hai.

Khawateen ki Age 25 saal aur 48 saal thi jab kay bachay ki Age 9 saal aur zakhmi honay wali bachi ki Age 6 saal hai.

Pakistan mehakma mosmiyat ke senior Afsar Ghulam Rasool ka kehna hai ke zalzalay ke jhatkay Punjab aur Khyber pakhton khwa ke deegar shehron mein bhi mehsoos kiye gaye.

Muqami mehakma mosmiyat ke mutabiq zalzalay ki shiddat 4.6 aur is ki geherai 10 kilometer thi.

Yaad rahay ke October 2005 mein Pakistan aur Hindustan ke sarhadi ilaqon mein 7.6 shiddat ke anay walay zalzalay mein 73 hazaar log halaak jab kay 3 laakh 50 hazaar afraad be ghar ho gaye they.

Isi terha saal 2013 mein Balochistan mein anay walay 7.7 shiddat ke zalzalay ke baais 370 afraad halaak aur 1 laakh be ghar hogaye they.

Karachi Samait Sindh Bhar Mein Selaab Ka Khadsha

Director General Mehakma Mosmiyat Dr. Ghulam Rasool Ka Kehna Tha Ke Sindh Mein Shadeed Baarishon Aur Selabi Railay Ke Baais Karachi Aur Hyderabad Sameit Sindh Bhar Mein Selabi Soorat-e-Haal Peda Honay Ka Khadsha Hai.

DG Mehakma Mosmiyat Dr. Ghulam Rasool ka kehna hai ke Punjab aur Khyber Pakhtun khwa mein tabahi machane ke baad selabi rayla Sindh mein daakhil ho raha hai jab ke Karachi aur Hyderabad mein bhi shadeed baarishon ka imkaan hai.
Agar ye pani akhatta ho gaya to dono shehron ke liye mushkilaat barh sakti hain aur selabi soorat e haal peda honay ka bhi khadsha hai.

Unka kehna tha ke sooba Sindh mein baarishon ka bara system daakhil ho raha hai.

Sooba Sindh ke agly 4 se 5 roz mein barishain hongi Sindh aur Punjab se mulhiqa Balochistan ke elaqon mein bhi barishain hongi.

Doosri janib mehakma mosmiyat ka kehna hai baarisho ka haliya system 3 roz pehlay India se Balochistan mein daakhil howa jab ke taiz baarishon ka dosra system juzwi tor par Bahera Arab mein daakhil ho raha hai jo is waqt Karachi ke qareeb mojood hai.

Yeh system nichle baadalon ke sath mil kar darmiyani barish day sakta hai aur isi ke tehat Badeen aur thatta mein bhi barishain ho sakti hain..

Bin Qasim Jamshoro Thermal Plants Mein Kharabi Se Sindh ke 17 Districts Mein Break Down

 Soobay Ke Mutadid Elaqay Ta’Haal Pani Ki Qillat Ka Shikaar Roza Daaron Ko Sehri Ki Tayari Mein Shadeed Mushkilaat Ka Saamna Karna Rara.

Karachi: Roshiniyon ke shehar Karachi mein 10 ghantay baad bijli bahaali ka amal shuru hogaya beshtar elaqay 12 ghantay baad bhi bijli se mahroom hain.

Shehrion ne raat karb mein guzari roza daaron ko sehri ke waqt bhi mushkilaat ka saamna raha bijli na honay se pani ki bhi shadeed qillat peda hogayi.

Shehar Quaid mein 10 ghantay baad bijli bahaali ka amal shuru hogaya ta’hum beshtar elaqon ki bijli 12 ghantay baad bhi bahaal na ho saki.

Guzashta raat shehri taraveeh ki tayarion mein masroof they ke taqreeban 9 bujey shehar ke 70 feesad elaqon ki bijli achanak chali gayi jis ki wajah se Karachi airport samait mutadid hospital bhi bijli se mahroom ho gaye.
Bijli ki achanak muatali se shopping centers aur markets mein bhi shehrion ko mushkilaat ka saamna karna para. Shehar quaid ke makeeno ny raat karb mein guzari.

Roza daaron ko sehri mein mushkilaat ka saamna raha tarjuman k-Electric ka kehna hai ke bijli bahaali ka amal jari hai PECHS, Federal B area, Gulshan Iqbal aur Bafar zone ke mukhtalif elaqon ki bijli bahaal kar di gayi hai jab’ke Gulsitan e Johar, Landhi Korngi, Mlir. Sar syed town, Site town, Garden aur Gulshan Iqbal bock 10, 3 aur 13, CVU, Defence, Clifton , North Nazimabad ke mukhtalif elaqay Jail road Kashmir road aur Tariq Road ke atraaf bijli moattal hai.

Bijli ki taweel bandish ke baais rehaishi elaqon mein pani ki qillat peda hogayi doosri janib bijli ki achanak muatali ke baais dhabiji pimping station par 72 inch qutar ki pipe line phatnay se shehar ko aik crore Gailan se zayed pani kam faraham howa jis se Landhi, Korngi, Qayyomabad, Akhtar colony aur Defence ke elaqay mutasir hue hain.

Hisko tarjuman ke mutabiq jaam shoro ke 14 Districts mein bijli bahaal kar di gayi hai ta’hum Nawab Shah mein ta haal bijli bahaal na ki ja saki.

Mirpur khaas mein raat 10 bujey se bijli band hai.
Haala aur matiari mein bhi ta haal bijli bahaal na ho saki jis ke baa’is roza daaron ko sakht mushkilaat ka saamna hai.

Yomey Hazrat Ali Ke Moqay Per Karachi Aur Haiderabad Mein Motorcycle Ki Double Sawari Par Pabandi

 Majalis Aur Juloos Ki Security Ke Liye 10 Hazaar Se Zayed Ahelkaar Tainaat, Buland Emaarton Par sniper Ko Tainaat Karne Par Gor.

Karachi: Karachi Mein Yomey Shahadat Hazrat Ali par majalis aur juloos ki security ke liye 10 hazaar 763 police officers aur ahelkaar faraiz sar-anjaam denge.

Karachi, Haiderabad aur Sukkur mein double sawari par bhi pabandi Aaid kar di gayi hai.
Karachi mein Yomey Shahadat Hazrat Ali ke mauqa par Sindh rangers aur police ki janib se security ke khusoosi intizamaat tarteeb diye gaye hain.

Shehar ke 3 zone mein munaqidah 331 majalis aur bar Aamad honay walay 178 juloos ki security ke liye majmoi tor par 10763 ahelkaar security par tainaat kiye jayengay.

South zone mein 5 hazaar 809 ahelkaar, West zone mein 3 hazaar 480 aur East zone mein 1 hazaar 474 officers aur ahelkaar security ke faraiz sar-anjaam deingay.

jab’ke ranger ke jawan bhi Yomey Hazrat Ali ke mauqe par hassas maqamat par tayinaat kiye jayengay.

Markazi juloos ki guzar gahon ke atraaf ki buland emaarton par sniper ki taenati watch tower qaim karne aur bomb disposel squad ke zariye suyping karne ki hidaayat di gayi hai.

Doosri janib Karachi Sukkur aur Haiderabad mein 8th ur 9th July ko motorcycle ki double sawari par bhi pabandi Aaid kar di gayi hai.

mehakma dakhla ki janib se jari karda notification ke mutabiq bachay, khawateen, buzurag, sahafi aur qanoon nafiz krne wale idaron ke ahelkaar pabandi se mustashna hongay..

Jacobabad Train Ko Barood Se Urane Ka Mansoobah Nakaam

 Jacobabad: Report Ke mutabiq Jacobabad Mein Baroodi Mawaad Se Trinon Ko Urane Ka Mansoobah Nakaam Bana Diya Gaya Track Se Bhaari Miqdaar Mein Dhamaka Khaiz Mawaad Bar Aamad Kar Ke Track Ko Clear Qarar Day Diya Gaya.

Jacobabad ki tehseel thal mein baju mourr ke ilaqay mein namaloom takhreeb karon ne railway track par bhaari miqdaar mein baroodi mawaad nasb kar diya tha.

Ittila milnay par police bomb disposel squad aur qanoon nafiz karne walay idaron ke ehalkaron ne ilaqay ko ghairay mein lay liya.

Search operation ke douran railway track se baroodi mawaad bar aamad kar liya gaya.

Bomb disposel squad ne mukammal talashi ke baad track ko clear qarar day diya qanoon nafiz karne walay idaron ne waqeye ki tafteesh shuru kar di hai.

Gujranwala pull Totnay Se Train Ko Haadsa

 Gujranwala: Gujranwala Mein Head Chana Waan Ke Qareeb Pull Totnay Se Train Neher Mein Ja Giri Haadsay Mein 3 Afraad jaan’bahaq Jab’kay Mutadid Afraad Zakhmi Hogaye.
Fouj Ka Rescue operation Jari Hai Wazeer-e-Azam Ne Train Haadsay Par Dukh Ka Izhaar Kiya Hai.

Train panno Aqil se kharyan ja rahi thi railway zaraye ke mutabiq train mein 6 musafir bogian aur 21 maal bardaar bogian theen.

Haadsa dopehar 12 bujey ke qareeb paish aaya jab gaari jamkay chatta ke qareeb pall chana waan par pohanchi to pull achanak gir gaya jis se train ki 3 bogian neher mein gir gayeen.

Haadse ki ittila mlitay hi imdadi teams mauqe par poanch gayeen aur karwai shuru kar di.

Pak Army ny bhi ilaqay ko ghairay mein le liya aur neher mein girnay wali bogyon ko nikaalne ki karwai shuru kar di gayi 2 helicopter resque operation mein hissa le rahay hain.

Zaraye ka kehna hai ke train mein lag bhag 200 afraad sawaar they jin mein se beshtar ko nikaal liya gaya hai baqi afraad ko nikaalne ka kaam jari hai.
Zakhmiyon ko CMH Gujranwala muntaqil kar diya gaya hai divisional superintendent pakistan Railways ke hukum par head chana waan par honay walay train haadse mein imdadi karwaiyon ke liye relief train Lahore se rawana kar di gayi hai.

Relief train jaye waqooa par poanch kar neher mein girnay wali train ki bogyon ko bahar nikalegi aur doobnay walay afraad ko nikaalne mein madad keregi.

Relief train mein technical mechanical aur medical amla bhi rawana kiya gaya hai.

Mulk Bhar Mein Ramzaan Ul Mubarak Ka Chand Nazar Nahi Aaya

 Karachi: Markazi Rwait Halal Committee Ke Mutabiq Mulk Bhar Mein Ramzaan Ul Mubarak Ka Chand Nazar Nahi Aaya Jis Ke Baa’is 1st Ramzaan 19 June baroz Jummay ka Hoga.

Ramzaan Ul Mubarak ka chand dekhnay ke liye markazi Rwait Halal committee ka ijlaas mufti Muneeb Ul Rahman ki zair sadarat Karachi mein howa jis mein zonal committee ke arakeen mukhtalif makatab fikar se talluq rakhnay walay ulmaye karaam samait wizarat mazhabi umoor mehakma mosmiyat aur Suparco ke numaindgaan ne bhi shirkat ki jab ke is ke elawa mulk ke deegar shehron mein bhi Sobai aur zonal Rwait Halal cometion ke ijlaas huye jis mein chaand se mutaliq shahadton ko ikhatta kiya gaya.

Islamabad aur Punjab bhar mein Ramzaan Ul Mubarak ka chaand nazar anay ki koi shahadat masool nahi hui jis ke baad zonal cometion ne chaand nazar na anay se mutaliq apne faislay se markazi committee ko aagah kiya jab ke Karachi samait mulk ke deegar shehron mein bhi chaand nazar anay ki koi shahadat masool nahi hui.

Karachi mein press conference karte hue markazi Rwait Halal committee ke chaiman Mufti Muneeb Ur Rahman ka kehna tha ke mulk bhar mein kahen bhi chaand nazar anay ke koi shawahid nahi miley aur is hawalay se koi shadatain bhi masool nahi huien lehaza mulk bhar mein chaand nazar na anay ke baa’is 1st Ramzaan Ul Mubarak 19 June baroz jummay ko hoga..

Ramzaan Ul Mubarak Ka Chand Kal Nazar Anay Ka Imkaan Hai

Karachi: Mehakma Mosmiyat Ka Kehna Hai Ke Kal Mutala Saaf Hoga Is Liye Chand Nazar Anay Ke Qaumi Imkanaat Hain.

Report ke mutabiq mehakma mosmiyat ka kehna hai ke kal mutala saaf hoga is liye kal shaam 7 bajkar 5 minute par chand nazar anay ke imkanaat hain jis ke baad jumeraat ko pehla roza hoga.

Mehakma mosmiyat ke mutabiq Ramzan Ul Mubarak ka chand dekhnay ka dorania 38 minute hoga jab ke naye chand ki Umar 24 ghantay 44 minute hai.

Doosri janib markazi Rwait Halal committee ka ijlaas kal Karachi mein mehakma mosmiyat ke daftar mein hoga jis ki sadarat chairman Rwait Halal committee Mufti Muneeb Ur Rahman karenge.

Karachi Mein Motocycle Sawaron Ke Liye Helmit Zaroori

 Karachi: Motorcycle Par Safar Karne Walon Ko Mangal Se Helmit Ka Laazmi Istemaal Karna Hoga Jis Ki Khilaaf Warzi Karne Walon Ke Khilaaf 9 June Se Karwai Amal Mein Layi Jayegi.

Traffic police hakkaam ka kehna hai ke shehar Quaid mein motorcycle par safar karne walon ko mangal se helmit laazmi pehnana hoga aur motorcycle chalanay walay shakhs ke sath sath peechay bethnay walay khuwa woh mard ho ya aurat dono ko laazmi helmit pehnana hoga.

Khilaaf warzi karne walay afraad ke khilaaf 9 June se 150 rupay se 300 rupay tak ke chalaan ke sath qanooni charah joi bhi ki jaye gi.

Is pabandi ka itlaq traffic police, district police aur deegar units mein tainaat police Officers aur Ahlkaron par bhi hoga ba’sorat deegar un officers o ehalkaron ke khilaaf bhi qanooni chara jui ki jayegi.

Traffic hakkaam ka kehna hai motorcycle sawaron ko helmit ke istemaal ka paband bananay ka maqsad un ke safar ko ziyada se ziyada mehfooz banana hai kyun ke shehar mein honay walay traffic hadsaat mein 60% Mout motorcycle par safar karne walon ki hoti hai jin mein aik tahai motorcycle mein safar karne afraad shaamil hotay hain aur amwaat ki bunyadi wajah helmit ka istemaal na karna hota hai.

Unhon ne kaha ke motorcycle par sawaar khawateen mein helmit pahannay ke rujhan mein izafay ke liye muft helmit taqseem kiye jayenge.

Doosri janib shehar Quaid ke shehrion ne traffic police ke iqdaam ko saraha hai jabkay kuch shehrion ne usay anokha iqdaam bhi qarar diya hai.

Shehrion ka kehna hai ke mazkoorah muhim bhi maazi ki tarha is martaba bhi Eid Ul Fittar se qabal traffic police ke sath sath district police ke liye kamaai ka zareya saabit hogi.

Shehrion ne mutalba kiya hai ke mazkoorah pabandi ke douran buzurag bachon aur khawateen ko helmit pahannay se mustasna qarar diya jaye.

Motorcycle par safar karne wali beshtar khawateen ka kehna hai ke wo burqa aur abaya pehan kar apne bachon ke hamra motorcycle par safar karti hain isi soorat mein un ke liye na sirf helmit pehnana intehai mushkil amal saabit hoga balkay woh kisi aur duniya ki makhlooq bhi lagengi.

Shehrion ka kehna hai ke agar kisi shehri ne safar ke douran helmit pehna howa nahi hai to inhen roknay ya is ka chalaan karne ka ikhtiyar sirf traffic police officers ya ehalkaron ko hi hona chahiye.

Aesa na ho ke traffic police ki Aar mein police ahelkaar shehrion se lout maar karen..

Bahera Arab Mein Ban’nay Wala Hawa Ka Shadeed Kam Dabao Tufaan Mein Tabdeel

 Karachi: Bahera Arab Mein Ban’nay Wala Hawa Ka Shadeed Kam Dabao Tufaan Mein Tabdeel Ho Gaya Hai Jisay Ashoba Ka Naam Day Diya Gaya Hai.

Mehakma mosmiyat ki janib se bayan ke mutabiq bahera arab mein ban’nay wala hawa ka shadeed kam dabao tufaan mein tabdeel ho gaya hai jisay baqaida tor par Ashoba ka naam day diya gaya hai.

Samandari tufaan Ashoba aik nut fi ghanta ki raftaar se agay barh raha hai aur is waqt Karachi ke shumal mein 850 kilometer ki doori par hai.

Mehakma mosmiyat ke mutabiq 80% imkaan hai ke Ashoba oman ke saheli ilaqay se takrayega jab ke 20% imkaan hai ke tufaan Balochistan ke saahil se takrayega.

Doosri janib tufaan ke khadshay ke paish e nazar Karachi mein mahi geron ko saahil samandar se door rehne ki Hidayat jari kar di gayi hain jab ke ainda 24 ghanton ke douran Sindh aur Balochistan ke saheli ilaqon hisson mein garaj chamak ke sath barish ka imkaan bhi zahir kiya ja raha hai.

Bahera arab mein ban’nay walay tufaan ke mumkina tor par Karachi ke saahil se takaraane ke khadshay ke paish e nazar shehar bhar ke hospitals mein emergency nafiz kar di gayi hai jab ke ke electric ne bhi apne operation ko fa-aal kardiya hai.

News
Karachi
December 2018
M T W T F S S
« Mar    
 12
3456789
10111213141516
17181920212223
24252627282930
31