Monthly Archives: November 2015
Lahore Se Karachi Jane Wali Night Coach Ki 3 Boogies Ulat Gayeen
Lahore: Raiwind Ke Qareeb Phaatak Cross Karte Hue Trailer Taiz Raftaar Musafir Train Ki Zad Mein Agaya Jis Ke Nateejay Mein Trailer Ka Driver Mauqe Par Jaan Bahaq Jab Ke 3 bogies Ulat Gayeen.
Report ke mutabiq Raiwind ke qareeb phaatak khula reh jane se trailer tez raftaar night coach ki zad mein agaya jis ke nateejay mein trailer ka driver mauqe par jaan bahaq jab ke train ki 3 bogies patri se utar gayeen jis ke baais kayi musafir zakhmi hogaye.
Haadsay ke fori baad logon ki barri tadaad jama hogai aur zakhmion ko qareebi hospital muntaqil kar diya.
Aeni Shahideen ke mutabiq haadsa phaatak khula reh jane ke baais paish aaya aur achanak coaster train ke samnay anay par train driver ne hungami break lagai jis ki wajah se 3 bogies patri se utar gain..
Islamabad Mein Mobile Phone Service Achanak Band
Islamabad: Wafaqi Dar Ul Hakoomat Mein Mobile Phone Service Achanak Band Ho Gayi Jis Ke Baais Shehrion Ko Shadeed Mushkilaat Ka Saamna Karna Par Raha Hai.
Report ke mutabiq Islamabad ke red zone aur qareebi elaqon mein mobile phone achanak band honay se shehrion ko mobile phones se call karne mein mushkilaat ka saamna karna para taham PTA ki janib se koi wazahat samnay nahi aayi.
Media par mobile phone service ki khabar Nashar honay ke baad mobile phone service bahaal ho gayi.
Wazeh rahay ke malik mein mobile phone service ahem tqarib ke mauqa par security khadshaat ke paish e nazar band ki jati hain jab ke mobile phone service ki muatali ke hawalay se awam ko pehlay aagah bhi kiya jata hai..
WiFi Se 100 Guna Ziyada Raftaar Wala ‘LiFi’ Tayyar
Edinburgh: Internet Ki Speed Se Aksar Log Pareshan Rehtay Hain Aur Shikayat Karte Nazar Atay Hain Lekin Ab Unhen Pareshan Honay Ki Zaroorat Nahi Kyun Ke Ab Wifi Se 100 Guna Ziyada Taiz Raftaar Lifi Maidan Mein Aagaya Hai Jo Data Ko Ziyada Taizi Se Muntaqil Karne Ki Salahiyat Rakhta Hai.
University Of Edinburgh ke Scientists ne radio band ki bajaye roshni ke zariye data muntaqili ka pehli baar Lab se bahar Tajurba kiya jis ke herat angaiz nataij samnay aeye aur data Wifi se 100 guna ziyada taizi se muntaqil howa.
Is Ejaad ke inventor Harald Hayes ne Lifi ke liye visible light communication (VLC) ka istemaal karte hue intehai jadeed morse code ke zariye usay qabil istemaal banaya.
LED micro chips lagey bulb ke of aur on ke douran roshni aam aankhh se mehsoos nahi ki jasakaygi jab ke yeh amal data ko binary code par muntaqil kar daita hai.
Scientists ka kehna hai ke pehli baar is tajarbay ko Lab se bahar kiya gaya aur yeh baat samnay aayi ke yeh tareeqa aik second mein aik GB data muntaqil karta hai jo ke Wifi se 100 guna ziyada raftaar hai jis ka matlab hai ke is ke market mein atay hi internet ki raftaar herat angaiz hadd tak taiz hojayegi.
Company ke cheif executive officer Deepak Solnki ka kehna hai ke fil haal Industrial mahol mein Smart Lighting Solutions ka istemaal kiya ja raha hai kyun ke wahan light ko data muntaqili ke liye istemaal kiya jata hai.
Unka kehna hai ke Lifi na sirf taiz raftaar hai balkay mehfooz bhi hai kyun ke roshni dewaron se nahi guzar sakti is liye deegar device ki mudakhlat bhi mumkin nahi.
Lifi ke Inventor Hayes ka kehna hai ke jald poori duniya LED light bulb mein lagi micro chips ki madad internet istemaal karenge..
Shah Abdal Latif Bhitai Rehmat Ullah Alaihi Ka Urs 27th November Ko Sindh Bhar Mein Aam Tateel Ka Elaan
Karachi: Sindh Hukoomat Ne Azeem Sufi Buzurg Aur Shayar Shah Abdal Ltif Bhitai Rehmat Ullah Alaihi Ke Urs Ke Mauqe Par 27 November Ko Soobay Bhar Mein Aam Tateel Ka Elaan Kar Diya Hai.
Sindh hukoomat ki janib se jari karda notification ke mutabiq 27 November baroz jumma Hazrat Abdal Latif Bhitai Rehmat Ullah Alaihi ke Urs ki munasbat se Sindh bhar mein Aam tateel hogi.
Iska itlaq khud mukhtaar corporation samait Sindh hukoomat ke tamam idaron aur sarkari O niji taleemi idaron par hoga.
Wazeh rahay ke Sindh mein har saal 14 safar ko hazrat Shah Abdal Latif Bhitai Rehmat Ullah Alaihi ke Urs ki munasbat se Aam tateel hoti hai..
Karachi Mein Bomb Dhamakay Ke Natijay Mein 1 Shakhs Jaan Bahaq
Karachi: Lee’Market Mein LPG Cylinder Ki Dukaan Mein Dhamakay Ke Natijay Mein 1 Shakhs Jaan Bahaq Jab Ke 5 Zakhmi Hogaye.
Report ke mutabiq Karachi ke elaqay Lee’Market mein LPG Gas Cylinder ki dukaan mein achanak dhamaka hogaya jis ke natijay mein 6 afraad zakhmi hogaye.
Zakhmion ko fori tor Civil hospital muntaqil kiya gaya jahan 1 zakhmi dam tor gaya jab ke deegar ki haalat bhi tashweesh-naak hai.
Waqeye ke baad police aur bomb disposel squad ki teams ne shawahid ikathay kiye.
Bomb disposel squad ka kehna hai ke dhamaka cylinder phatnay se nahi hua balkay is ke liye Aadha kilo baroodi mawaad istemaal kiya gaya aur se remote control ke zariye uraya gaya..
Islamabad Aur Lahore Samait Khyber Pakhtun Khwa Ke Mukhtalif Elaqon Mein Zalzalay Ke Shadeed Jhatkay
Islamabad: Khyber Pakhtun Khwa Ke Mukhtalif Elaqon Samait Lahore Aur Islamabad Mein Zalzalay Ke Shadeed Jhatkay Mehsoos Kiye Gaye.
Report ke mutabiq Fata, Khyber Pakhtun Khwa, Azad Kashmir aur Punjab ke mukhtalif azlaa mein zalzalay ke shadeed jhatkay mehsoos kiye gaye aur richter scale par is ki shiddat 6.2 record ki gayi.
Zalzala pema markaz ke mutabiq zalzalay ka markaz Afghanistan Tajksitan ka sarhadi ilaqa hai.
Khyber Pakhtun Khwa ke jin shehron mein zalzalay ke jhatkay mehsoos kiye gaye un mein Peshawar, Mansehra, Hari poor, Swat, Shangla, Malakand, Naushera, Der, Hangu, Bsham, Kohastan aur Kohaat shaamil hain.
Lahore Islamabad samait Punjab ke jin azlaa mein zalzalay ke jhatkay mehsoos kiye gaye un mein Sheikhupura, Sialkot, Gujranwala, Sargodha, Manndi Baha uddin, Gujranwala, Miyanwali, Khushab, Sahiwal, Narrwal, Hafiz abad, Qusoor aur Vihaari shaamil hain jab ke Kotli Azad kshmir aur khyber agency mein bhi zalzalay ke jhatkay mehsoos kiye gaye.
Lahore Sheikhupura Aur Qareebi Shehron Mein Zalzalay Ke Jhatkay
Lahore Sheikhupura Aur Qareebi Shehron Mein Zalzalay Ke Jhatkay Mehsoos Kiye Gaye.
Log Kalma Ttayyiba Ka Vird Karte Gharon Se Nikal Aaye richter scale Par Shiddat Record Ki Gayi.
Lahore: Zalzala Pema Mmarkaz Ke Mutabiq Zalzalay Ka Markaz Lahore Se 50 Kilometer door Maghrib Mein Tha Jo Ke Sheikhupura Banta Hai.
Zalzalay ki geherai 30 kilometer record ki gayi.
Sheikhupura mein 3.4 shiddat ke zalzalay se logon mein khauf o hiraas phail gaya aur log kalma tayyiba ka vird karte gharon se bahar nikal aaye.
Mehakma mosmiyat ke mutabiq zalzalay ke jhatkay 3 baj kar 48 minute par mehsoos kiye gaye..
Shayar Mashriq Allama Mohammad Iqbal Ka 138th Yom-E-Pedaiesh Aaj Manaya Ja Raha Hai
Shayar Mashriq Aur Azeem Mufakkir Dr. Allama Mohammad Iqbal Ka 138th Yom-E-Pedaiesh Aaj Manaya Ja Raha Hai.
9 November 1877 ko Sialkot mein Ankh kholnay walay Allama Mohammad Iqbal ne ibtidayi taleem apne aabai shehar mein haasil ki aur phir Lahore ka rukh kiya.
1899 mein MA karne ke baad oriental college mein shoba dars o tadrees se wabsta hogaye aur is douran shairi bhi jari rakhi.
Allama Iqbal 1905 mein Bartania chalay gay jahan pehlay unhon ne Cambridge University Trinity College mein dakhla liya aur phir Maroof taleemi idaray Lincoln’s Inn mein waqalat ki taleem lena shuru kar di phir woh Germany chalay gaye jahan Munich University se unhon ne falsafah mein PHD ki degree haasil ki.
Dr. Mohammad Allama Iqbal ne 1910 mein watan wapsi ke baad waqalat ke sath siyasat mein bhi hissa lena shuru kiya aur apni shairi ke zariye fikri aur siyasi tor par muntashir Musalmanoon ko khawab ghaflat se jagaya.
1934 ko Muslim League ke markazi parlimani board ke rukan banay taham tabiyat ne un ka sath na diya aur woh qayam Pakistan se 9 baras qabal 21 April 1938 ko Lahore mein apne khaaliq haqeeqi se ja milay.
Mufakkir Pakistan ke yom e pedaiesh ke mauqe par mulk bhar mein khusoosi taqrebaat ka ihtimaam kiya ja raha hai.
Is silsilay mein mazaar e Iqbal par guards ki tabdeeli ki purwaqar taqreeb mein Pakistan behria ke dastay ne Pakistan Rangers ki jagah faraiz sambhale.
Is mauqe par Station Commander Navy Commodore SM Shahzad ne Mazaar par phool charhaye Fatiha khawani ki mehmanon ki kitaab mein apne remarks likhay.
Is ke ilawa Sialkot mein waqay Iqbal manzil par bhi shayar mashriq se jari cheezon ko dekhnay awam ka Tanta bndh gaya hai..
Pakistan Ne England Ko Aakhri Test Mein Shikast Day Kar Series Jeet Li
284 Runs Ke Target Mein England Ki Team 156 Par Out,
Shoiab Malik Ki 3 Aur Yasir Shah Ki 4 wickets..
Sharjah: Pakistan ne Sharjah test mein England ko 127 runs se shikast day kar series apne naam kar li hai.
Sharjah mein khailay janey walay match mein England ki team 284 runs ke target ke taqub mein 156 runs par dhair hogayi.
England ki janib se Alastair Cook 63 runs bana kar top score rahay un ke ilawa Moeen Ali aur Adil Rasheed ne 22,22 runs ki ining khelain.
Pakistan ki janib se Yasir Shah ne 4, Shoiab Malik ne 3, Zulfiqar Babar ne 2 aur Rahat Ali ne 1 wicket hasil ki.
Pakistan ne match ki pehli ining mein 234 runs banaye they jis mein Misbah Ul Haq 71 runs ke sath top score they jab kay 2nd ining mein Mohammad Hafeez ne 151 runs ki shandaar inning kheli.
Pakistan ka 2nd ining mein total 355 score raha.
England ki team ne 1st ining mein 306 runs banaye James Taylor 76 runs ke sath top score rahay.
1st ining mein Rahat Ali ne 2, Yasir Shah ne 3, Shoiab Malik ne 4 aur Zulfiqar Babar ne 1 player ko out kiya.
England ki team ko 2nd ining mein jeet ke liye 284 runs ka target mila magar all team 156 runs par out ho gayi.
Alastair Cook 63 runs ke sath top score rahay.
Yasir Shah ne 4, Shoiab Malik ne 3, Zulfiqar Babar ne 2 aur Rahat Ali ne 1 wicket haasil ki.
Pakistan ne 3 matches ki series 0-2 se apne naam karli hai.
Sharjah test mein Pakistani spin bowling ne England ko khul kar khailnay nahi diya.
Leg spinner Yasir Shah ne Sharjah stadium mein 7 shikaar kiye.
Unko behtareen performance par man of the series aur Mohammad Hafeez ko man of the match ka award diya gaya.
Lahore Factory Hadsa Jaan Bahaq Afraad Ki Tadaad 23 Hogayi
Lahore: Sunder Industrial State Mein Factory Ki Building Se Nikaali Gayi Dead bodies Ki Tadaad 23 Hogayi Hai Jab Ke Malbay Se Darjanon Mazdoor Ab Tak Nahi Nikalay Ja Sakay.
Lahore ki sunder industrial state mein waqay factory ki building zameen bose huwe 24 ghantay se zayed waqt guzarnay ke bawajood malbay se tamam mazdooron ko nahi nikala jaska.
Relief Activities mein 400 se zayed afraad hissa le rahay hain jin mein Resque 1122, Pak Fouj, Edhi Foundation, Falah Insaaniyat Foundation sameit mutadid Organizations ke workers shaamil hain.
Malbay se ab taq 23 afraad ki dead bodies jab ke 120 afraad ko zakhmi haalat mein nikaal liya gaya hai.
Pak fouj ke ahelkaar factory ke ‘Lenter’ mein hole kar kay building ke andar daakhil ho kar andar mojood afraad ko nikaalne mein masroof hain.
Resque 1122 ke DG brigedier retired Dr. Arshad ka kehna hai ke factory ke malbay mein ab bhi kayi afraad dabey hue hain jin mein se kayi afraad ka guzashta roz taq un ka mobile phone par rabita tha taham mobile phones ki battery khatam hojane ki wajah se un se ab rabita nahi ho pa raha.
Malbay mein dabey afraad ko zinda nikaalne ke liye intahi ahtihyaat se kaam liya ja raha hai is liye imdadi kaam kal taq jari rehne ka imkaan hai.
Dr. Arshad ka kehna hai ke haadsay ke waqt factory mein mojood afraad ki sahi tadaad ka inhen koi ilm nahi kyun kay haazri ka tamam record malbay mein daba howa hai lekin factory ke bahar mojood la’pata afraad ke vursa se tafseelaat jama ki jarahi hain.
Wazeh rahay ke guzashta shaam plastic bag tayyar karne wali factory ki building us waqt zameen bose hogayi thi jab is mein barri tadaad mein afraad mazdoori mein masroof they..
