Monthly Archives: September 2014
Imran Khan Ne Civil Nafarmani Ki Tehreek Ke Tehat Apna Bijli Ka Bill Jala Diya
Islamabad: Chaiman Tehreek Insaaf Imran Khan Ne Civil Nafarmani Ki Tehreek Ke Tehat Dharnay Mein Apna Bijli Ka Bill Jala Diya Jab Ke Dharnay Mein Mojood Shurka Ne Bhi Apne Bil Jala Dalay.
Islamabad mein D chowk par dharnay ke shurka se khitaab karte hue Imran Khan ne kaha ke Nawaz Sharif kisi ghalat fehmi mein na rahen ke mein yahan se thak kar chala jaoon ga,
Hum ne barri Eid ka plan bana liya hai hum qurbani bhi dharnay mein hi karen ge kyun kay agar hum yahan se chalay gaye to dhandli ki koi tehqiqaat nahi hogi.
Unhon ne kaha agar Nawaz Sharif ne resign nahi diya to un ke liye har din mushkil hota jaye ga jabkay hukoomat ne hamaray Aadhay mutalibaat bhi nahi manay aur mutalibaat maan’ne ki baatein kar kay jhoot bola ja raha hai.
Imran Khan ka kehna tha ke Nawaz Sharif apne aap ko Quied-E-Azam se na milaain,
Quaid-E-Azam ne mulk Iqtidaar ke liye nahi balkay Pakistanio ke liye banaya tha unhon ne Pakistan banaya tha factories nahi banayen,
Quaid-E-Azam ne hamesha sach bola aur Nawaz Sharif ke jhoot be shumaar hain. unhon ne kaha ke hamaray yahan jama honay ka maqsad qoum ko un ke haqooq batana hai jaisay hi awam ko apne haqooq ka pata chal jaye ga tab kisi bhi hukumran mein awam ko bheer bakrion ki tarhan rakhnay ki jurrat nahi hogi.
Chaiman tehreek insaaf ne kaha ke mazdooron par zulm ho raha hai lekin koi poochnay wala nahi hai,
Sindh ke hariyon par jageerdaroon jaisa zulm kahin bhi nahi dekha,
Zulm kahin par bhi ho muqaabla karna sab ka farz hai aur hum isi zulm ke khilaaf Islamabad mein baithy hain kyun kay zulm O Na-insafi ka muqaabla karna jehaad hai jab’kay ab awam bhi hamaray nazariye ke liye uth khari hui hai…
World Cup Ki Fatah Ke Liye Saeed Ajmal Ka Team Mein Hona Zurori Nahi, Javed Miandad
Karachi: Pakistan Ke Sabiq Maaya Naz Batsman Javed Miandaad Ne Kaha Hai Ke World Cup Ke Tournament Mein Fatah Ke Liye Saeed Ajmal Ka Team Mein Hona Zaroori Nahi,
World cup ki trophy Lahore se Karachi pounchanay par is ka shandaar istaqbaal kya gaya.
Is mauqa par munqaid taqreeb se khitaab mein sabiq Pakistani legend batsman Javed miandaad ne kaha ke agar Saeed Ajmal par world cup ke Aaghaz tak pabandi barqarar rehti hai tab bhi Pakistan world cup jeetnay ki salahiyat rakhta hai.
Unka kehna tha ke Pakistan world cup jeet chuka hai jo tareekh ka hissa hai. agar Pakistani players apni poori salahiyaton ke sath khelain to qaumi team aik baar phir world cup jeetnay mein kamyaab hogi.
Javed miandaad ne aik sawal ke jawab mein kaha ke Pakistani team ko kisi aik player par hi inhisaar nahi karna chahiye. Aese player ke baray mein kyun socha jaye jo team ka hissa hi nahi hai balkay dosray khiladion ko apni zimma darion ko poora karna chahiye.
Wazeh rahay ke world cup Australia aur newzeland mein february se March ke douran khela jaye ga jab’ke Pakistan apna pehla match rawayeti hareef india ke khilaaf 15 february ko Adelaide mein khailay ga.
India Ne teh Shuda Tareeqa Kar Ke Tehat Pakistan Mein Selabi Pani Chorra,Indian High Commissioner
Karachi: Pakistan Mein Mutayyan Indian High Commissioner Ka Kehna Hai Ke Selabi Pani Par Pak India Moahida Mojood Hai Jis Par India Ne teh Shuda Tareeqa Kar Ke Tehat Pakistan Mein Selabi Pani Chorra,
Report ke mutabiq indian high commissioner T A C Raghon ne kaha ke mustaqbil qareeb mein pak india wazraye Azam ki mulaqaat mutawaqqa nahi jabkay indian prime minister narindar modi ke dora Pakistan ka schedule bhi teh nahi hai.
Unhon ne kaha ke selabi pani par pak india moahida mojood hai aur india ne teh shuda tareeqa kar ke tehat selabi pani chorra hai.
Indian high commissioner ka kehna tha ke guzishta dahaiyon se do Tarfa taluqaat mein doorian rahien lihaza ab ikhtilafat bhula kar haqeeqi muzakraat ki taraf jana hoga.
Tehreek Insaaf Ka 21 September Ko Karachi Mein Jalsa Karne Ka Faisla
Tehreek Insaaf Ne Hukoomat Ke Khilaaf Ehtijaj Ka Daira Wasee Karte Hue Barray Shehron Mein Jalson Ka Faisla Kiya Hai.
Is Silsila Mein Party Chairman Imran Khan 21 September Ko Karachi Mein Jalsay Se Khitaab Karenge,
Islamabad: Islamabad mein Imran Khan ki zer-e-sadarat tehreek insaaf ki core committee ke ijlaas mein kiya gaya.
Core committee ne ehtijaj ka daira dosray shehron mein phelanay aur Wazeer e Azam ke isteefay tak dharna jari rakhnay ke faislon ki toseeq ki. Imran Khan ke sunday ko Karachi mein jalsay se khitaab ki manzoori bhi di gayi,
Is silsila mein party chairman Imran Khan 21 September ko Karachi mein jalsay se khitaab karen ge.
Deputy secretary general Imran ismael ko Karachi jalsay ke intizamaat ki hidayat ki gayi hai.
Core committee ne tamam giriftar workers ki rihayi tak hukoomat se mazakraat moattal rakhnay ka faisla bhi kya hai.
Ijlaas ko bataya gaya ke Supreme Court aur high court mein dair darkhwaston ki bharpoor tareeqay se pairwi ki jaye. zaraye ke mutabiq ijlaas mein Multan ke halqa NA-149 ke zimni intekhab mein Shah Mahmood Qureshi ke betay ko larnay ki ijazat nahi di gayi…
Karachi Double Sawari Par Pabandi Qabal Az Waqt Khatam
Karachi Mein Motorcycle Par Double Sawari Par Pabandi Khatam Kar Di Gayi Hai.
Raat Gaye Police Ne Mukhtalif Karwaiyon Ke Douran 9 Mulzimaan Ko Arrest Kar Ke Asleha Bar Aamad Kar Liya,
Karachi 11 September ko shehar mein 10 din ke liye double sawari par pabandi Aaid ki gayi thi,
Jis ki khilaaf warzi par 1062 afraad ke khilaaf karwai ki gayi,
Aur 461 muqadmaat darj kiye gaye. police ne 5 din baad hi pabandi khatam kar di hai. quied abad mein police ne aik ghar par chhapa mar kar 3 mulzimon ko girftar kar liya. 3 mulzim daketi ki 50 se zayd wardaton mein matloob thay.
Aziz Bhatti town ke elaqay mein police ne loot maar karne walay 3 mulzimon ko muqablay mein giriftar kar liya.
Mulzimaan se asleha aur cash bar’aamad kar lia.
Pakistan bazaar ke elaqay mein bhi police ne 3 mulzimaan ko girftar karliya..
Pakistan Samait Duniya Bhar Mein Aaj Jamhoriat Ka Aalmi Din Manaya Ja Raha Hai
Karachi: Pakistan Samait Duniya Bhar Mein Aaj ”Jamhoriat Ka Aalmi Din” Manaya Ja Raha Hai
Yeh din aqwam mutahidda ki general assembly mein paas kardah mutafiqa qarardad A/62/7 ke tehat duniya bhar mein manaya jata hai jo ke 2007 mein Manzoor ki gayi thi,
Is qarar’daad mein duniya bhar ke mumalik se appeal ki gayi hai ke woh apne apne mumalik mein jamhoori idaron ko mazboot se mazboot tar’banayen apni qaumi policiyon mein awaami shirkat ko yaqeeni banayen,
Qarardad ki manzoori ke douran aqwam mutahidda ke tamam member mumalik ne is baat per attifaq kiya tha ke har saal 15 September ko duniya bhar mein”jamhoriat ka aalmi din”manaya jayega.
Muttahida Quami Movement (MQM) ke quaid Altaf Hussain ne aalmi yome jamhoriat per apne pegham mein kaha ke jamhoori nizaam mein awam ko siyasi, muashi, saqafati va mazhabi usoolon ke mutabiq zindagi guzaarne ki azadi hoti hai,
Jamhoori nizaam mein mulk ke tamam shehrion ka qaumi wasail par yaksaa haq hota hai…
Wazeer-e-Azam Nawaz Sharif Resign Den Ya Na Den Wo Farigh Ho Jaienge
Multan: Pakistan Tehreek Insaaf Ke Saddar Javed Hashmi Ka Kehna Hai Ke Wazeer-e-Azam Nawaz Sharif Resign Den Ya Na Den Wo Farigh Ho Jaienge Aur Agar Marshal’laa Laga To Na Sirf Mulk Toot Jayega Balkay Is Ke Lagnay Se Bohat Barri Baghaawat Hogi,
Multan mein press conference karte hue Javed hashmi ka kehna tha ke Islamabad mein jari dharnon ka koi anjaam nahi ho ga aur imran Khan kis terha dharnay se wapis ayen,
Zaalmon ne un ki wapsi ka koi rasta hi nahi chorra,
Imran Khan ki janib se show cause notice ka inteZar kar raha hun aur jab yeh notice mujhe mil jaye ga to is ka mann waan jawab day dunga. un ka kehna tha ke Sheikh rasheed Ahmed ne kaha ke Technocrat hukoomat ka elaan hoga aur is ke sarbarah cheif justice hon ge jab ke fouj ki jitni tauheen Sheikh rasheed ne ki hai shayad kisi aur ne aaj tak nahi ki ho.
Dharnon se mutaliq aik sawal ke jawab mein Javed hashmi ka kehna tha ke mein usay script nahi kehta, fouj aur ISI ko pata bhi nahi hoga lekin mojooda sorat e haal mein sirf retaired jarnail jaldi mein hain aur sabiq DG ISI hameed gull ne 10 roz pehlay mujh se kaha tha ke aaj ki raat aakhri hai, ejaz shah ne kaha tha Nawaz Sharif resign nahi den ge jab ke mein ne kaha tha ke marshal’laa aajay ga.
Javed hashmi ne kaha ke shahrah dastoor se agay jane ke hawalay se core committee ki koi meeting nahi hui thi,
Imran Khan aur tahreek insaaf ke rehnumao ki ghalat bayani par bohat dukh hai, Imran Khan samait tehreek insaaf ki poori qayadat meri aankhon mein ankhen daal kr bat kere to un ke salawon ka jawab dunga. unhon ne kaha ke Imran Khan bitayen kya esharon ke faislay nahi thay, Imran Khan ne kaha tha ke sab teh hai Supreme Court 3 maah mein election ka elaan kardeygi, Imran Khan table ke aik konay par aik aur dosray konay par dosra faisla karte hain.
Wazeh rahay ke dharnay ke hawalay se ikhtilafat par Javed hashmi ne press conference ke douran Imran Khan per sangeen qism ke ilzamaat lagaye jis ke baad Imran Khan ne bhi un se alehadgi ka elaan kardiya tha jab ke 2 September ko parliment ke mushtarqa ijlaas mein azhare khayal karte hue unhon ne qaumi assembly ki nashist se bhi resign de diya tha…
Hooshiyar! Hackers Ne 50 Laakh Ke Qareeb G Mail Paas Words Chori Kar Liye
New Delhi:Russian Hackers Ne 50 Laakh Ke Qareeb G Mail IDs Aur Paas Words Chori Kar Liye Jo Ke Drive, Plus, Youtube Aur Maps Waghera Ke Liye Bhi Istemaal Hotay Hain,
Indian media reports ke mutabiq russian Hackers ne taqreeban 49 laakh 30 hazaar G Mail IDs aur paas words chori kar liye hain aur yeh tamam paas words G mail ke ilawa, drive, plus, you tube aur maps ke liye bhi istemaal hotay hain.
Hackers ne accounts ki tafseelaat bhi internet par jari kar di hain aur kaha hai ke heck kiye gaye paas words mein se 60% paas words ab bhi Active hain.
Doosri janib Google ka kehna hai ke chori kiye gaye paas words mein se sirf 2% active hain aur hamaray khud’car anti high jacking system ne paas word chori karne ki bohat si koshishon ko roka.
Google ka kehna hai ke IDs aur paas words hamaray system ki kamzori ki wajah se chori nahi hue bal’kay aksar aisi Ehem cheezein mukhtalif zaraye se haasil ki jati hain.
Agar aap aik jaisi user IDs aur paas words ko mukhtalif Websites par istemaal karte hain aur un mein se aik Website hack ho jati hai to is account ke zariye se doosri Website par bhi ba aasani login ho sakta hai jab ke kuch hackers IDs aur paas words hack karne ke liye dosray tareeqay bhi istemaal karte hain…
Karachi Mein Motocycle Ki Double Sawari Par Pabandi Mein 5 Roz Ki Kami Kardi Gai
Karachi: Sindh Hukoomat Ne Karachi Mein Motocycle Ki Double Sawari Praayd Pabandi Mein 5 Roz Ki Kami Kardi Hai.
Report ke mutabiq mehakma dakhla Sindh ne Karachi mein 10 roz ke liye motocycle ki double sawari par Aaid pabandi mein 5 roz ki kami kar di hai. mehakma dakhla ke notification ke mutabiq motocycle ki double sawari par pabandi mehakma police ki sifarish par lagai gayi thi jisay 20 September tak nafiz kya gaya tha ta’hum is ki muddat mein kami ke baad pabandi ab 15 September tak nafiz rahay gi.
Wazeh rahay ke Karachi mein firqa warana target killing ke baad shehar mein 10 roz ke liye motocycle par pabandi aed ki gayi thi jis mein allama abbas kmeli ke sahibzaday molana akbar Ali aur jamea binoria ke muhtamim mufti Naeem ke damaad molana masood bag ko target killing ka nishana banaya gaya tha…
Musharraf Ki Aamriyat Nawaz Shareef Ki Jamhoriat Se Behtar Thi
Imran Khan Ne Kaha Hai Ke Awam Ko Haqooq Nahi Miley To Khooni Inqilab Ka Rasta Khul JayeGa.
Khud’Kash Hamlay Ka Saamna Karne Ke Liye Bhi Tayyar Hain. Dehshat Gardon Se Nahi Hukmraanon Ki Dehshat Gardi Se Khatra Hai,
Islamabad: dharnay ke shurka se khitaab mein Imran Khan ne kaha ke nojawanon ka mustaqbil andheray mein hai aur haqeeqi jamhoriat hi wahid hal hai.
Pakistanio beron mulk ja kar paisa to kama lo ge magar izzat nahi pa sakoge. mujhe Pakistan ki adliya se takleef hai jamhoori mulk mein adliya azad hoti hai, adliya ki azadi ke baghair haqeeqi jamhoriat nahi aa sakti,
Unhon ne kaha Iftikhar choudhary ki bahaali ke liye sab se agay mein tha tareekh gawah hai ke tehreek insaaf ne adliya ki bahaali ke liye koshishen kee mera Emaan tha ke adliya ki azadi ke baghair insaaf nahi mil sakta,
2013 ke intikhab ke waqt mujhe sabiq cheif justice par bharosa tha magar Iftikhar chohadry Pakistan ki tareekh ka Meer Jaffer nikla. Imran Khan ne kaha election se qabal hi keh diya tha ke intikhabaat shafaaf nahi honge kya is mulk ki adliya ka kaam insaaf dena nahi?
Dhandli ko chupanay ke liye qanoon ka istemaal kiya ja raha hai, mein ne pehlay hi keh diya tha ke agar insaaf nahi mila to sarkon par niklon ga. un ka mazeed kehna tha mujhe Pakistani fouj ki zaroorat nahi, meri fouj meri awam hai pur aman ehtijaj karne walon ko golian marain, grftaryan kee, adliya kahan thi ?. adliya se puchta hon kis qanoon ke tehat dharnay walon par danday barsaye gaye?
PTV hamlay mein agar tehreek insaaf ka ek bhi worker mulawis nikla to khud usay jail bhijwaonga.
Dj Butt ko muawza day kar sound system ke liye rakha howa hai. Imran Khan ka ye bhi kehna tha container Islamabad high court ke faislay ke baad bhi nahi uthaye ja rahay, jamhoriat ka raag alapne walay high court ke faislay par amal nahi kar rahay.ujrat se puchta hon kab apne haqooq ke liye kharay hoge,
Nawaz shareef had se ziyada dar’pok insaan hai khud kash hamlay ke liye bhi tayyar hon hukmraanon ki terha dar’pok nahi. mujhe dehshat gardon se nahi Nawaz shareef ki dehshat gardi se khatrah hai agar adliya awam ko insaaf nahi day gi to hum kidhar jayen ge?
kya adliya ka kaam human rights ka tahaffuz nahi ?. awam adliya ki bahaali ke liye is liye niklay thy ke inhen insaaf miley ga yahi waqt hai ke adliya awam ki behtari ke liye so motto action le agar awam ko haqooq nah miley to khooni inqilab ka rasta khul jayega,
Javed Khan ke dono betay thaanay mein hain cheif justice se puchta hon awam insaaf ke liye kis dar par jayen? unhon ne kaha general Musharraf ki aamriyat Nawaz shareef ki jamhoriat se behtar thi Nawaz shareef kyun mulk ki fouj ko badnaam kar rahay ho. shakeel ur Rahman Pakistan ka firaon hai. shakeel ur Rahman aur Nawaz shareef dono miley hue hain. Imran Khan ka kehna tha ke ab hukoomat se mazeed mazakrat ki zaroorat nahi…
