Withholding Tax Ke Khilaaf Karachi Ki Tamam Markets Mein Kaarobar Band
Tax Ke Nifaz Ka Faisla Wapis Na Liya Gaya To Hukoomat Ko Deegar Tax Bhi Ada Nahi Karenge Taajiron Ki Dhamki.
Karachi: Withholding Tax ke khilaaf taajiron ki hartaal ke baais aaj Karachi ki taqreeban tamam markets band hain.
All Karachi tajir ittehaad ka kehna hai ke agar faisla wapis na liya gaya to deegar tax bhi ada nahi karenge.
Doosri janib hartaal ke baais maeeshat ko arbon rupay ka nuqsaan aur mazdoor aaj apni ujrat se mahroom raha.
Mulk bhar ki tarha Karachi mein bhi tajir Withholding Tax ke muamlay par saraapaa ehtijaj hain.
Taajiron ki janib se Karachi ki taqreeban tamam markets jis mein Boltan Market, Jame Cloth Market, Buhri Bazaar, Akbar Road, Regal Chowk, Jorya Bazaar, Haidry Market aur Liaqatabad sameit deegar choti markets band hain.
Doosri janib taajiron ne mutalba kiya hai ke Withholding Tax ka faisla wapis liya jaye warna deegar tax bhi ada nahi karenge aur hartaal o ehtijaj ka silsila bhi jari rahega.
Taajiron ki hartaal se jahan maeeshat ko arbon rupay ka nuqsaan ho raha hai wahein mazdoor tabqa bhi buri tarha mutasir ho raha hai.
FBR ke mutabiq 1st October se Withholding Tax ki sharah aik baar phir .6% kar di jayegi.
Zaraye ke mutabiq Withholding Tax ke hawalay se jald Islamabad mein ahem ijlaas mutawaqqa hai.
Supreme Court Ka Urdu Ko Daftari Zabaan Ke Tor Par Raij Karne Ka Hukum
Islamabad : Supreme Court Ne Aaien Ke Article 251 Ke Tehat Urdu Ko Daftari Zabaan Ke Tor Par Raij Karne Ka Hukum De Diya.
Cheif justice of Pakistan justice Jawad S khwaja ki sarbarahi mein Supreme Court ke 3 rukni bench ne urdu ko sarkari aur daftari zabaan ke tor par raij karne se mutaliq faislay ki samaat ki.
Supreme Court ne apne faislay mein urdu zabaan ko raij karne se mutaliq 9 Hidayat jari karte hue kaha gaya hai ke Aaien ka itlaq hum sab ka farz hai.
Aaien mein darj hai ke 15 saal ke andar angrezi ki jaga urdu ko sarkari aur daftari zabaan ke tor par raij kiya jaye ga.
Aaien ke article 251 ke tehat urdu ko fori tor par daftari zabaan ke tor par nafiz kiya jaye. Wafaqi satah par muqablay ke imtehanaat mein qaumi zabaan istemaal ki jaye.
Supreme Court ne apne tafseeli faislay mein kaha hai ke tamam idaron mein article 251 ka nifaz yakeeni banaya jaye.
Qaumi zabaan ke rasam alkhat mein yaksaniyat ke liye hakoomaten hum ahangi peda karen teen mah ke andar hakoomaten qawaneen ka urdu zabaan mein tarjuma karen.
Adalti muqadmaat mein mehakmay apne jawabaat mumkina had tak urdu mein paish karen.
Awaami mafaad se mutaliq adalti faislon ko bhi urdu mein tarjuma kiya jaye.
Adalti faislay par amal-dar-aamad ke liye har shakhs qanooni chara joi ka haq rakhta hai.
Wazeh rahay ke kokab Iqbal aur Mahmood Akhtar Naqvi ki janib se allag allag darkhwasten dair ki gayi theen jin mein adalat Uzma se istada ki gayi thi ke Aaien ke article 251 ke tehat urdu ko sarkari aur daftari zabaan ke tor par raij karaya jaye.
Adalat Uzma ne 26 Augst ko samaat mukammal karte hue faisla mehfooz kar liya tha..
Yom-e-Difaa Ke Mauqe Par Motocycle Ki Double Sawari Par 2 Roz Ki Pabandi
Karachi Mein Yom-e-Difaa Ke Mauqe Par Motocycle Ki Double Sawari Par 2 Roz Ke Liye Pabandi Aaid Kardi Gayi Hai.
Karachi: Mehakma Dakhla Sindh ki janib se motocycle ki double sawari par 2 roz ke liye pabandi aed kardi gayi hai.
Police hakkaam ka kehna hai double sawari par pabandi Yom-e-Difaa ke mauqe par security khadshaat ko mad e nazar rakhtay hue lagai gayi hai.
Hakkaam ki janib se police ko mushtaba afraad ki kari nigrani ka bhi kaha gaya hai.
Double sawari ki khilaaf warzi karne walay afraad ke khilaaf muqadma darj kiya jayega..
USB Se Charge Honay Wala Duniya Ka Sab Se Chota Drone Tayyar
New York: American Company Ne USB Se Charge Honay Wala Duniya Ka Sab Se Chota Drone Tayyar Kar Liya Jis Ki Onchai Aur Lambai Sirf 3 Centi Meter Jab Ke Choraai 2 Centi Meter Hai.
American Company ke tayyar karda is drone ko duniya ke sab se chhootey’Quadcopter’ka aizaz haasil hai is drone ko’Areas access’ka naam diya gaya hai jo USB se charge honay ke baad 5 se 7 minute tak parwaaz kar sakta hai.
Drone ki tayari ka bunyadi maqsad naye logon ko drone urane ki tarbiyat faraham karna hai is mein nasb khusoosi Gyro Scope usay parwaaz ke douran mustahkam rakhtay hain.
Is ki charon pankhriyon par plastic ki hifazati patti lagai ja sakti hai taa kay taiz ghoomti hui pankhriyon ko toot phoot ya kisi nuqsaan se mehfooz rakha ja sakay jab ke is mein kartab dikhaane ke 2 option bhi hain jis ke zariye is ki parwaaz ko mazeed dilchasp banaya ja sakta hai.
Kayi rangon mein dastyab is drone ki qeemat 35 dollar hai aur usay October se farokht ke liye paish kya jayega.
Ab tak ye company apne chhootey drone ke 10 hazaar model farokht kar chuki hai aur ab is ny baqaida company qaim karkay mazeed behtar aur chhootey drone tayyar kiye hain.
Malaysia Mein Tarkin Watan Ki Kashti Ulatnay Se 14 Afraad Halaak
Kuala Lumpur: Malaysia Ke Maghribi Saahil Ke Qareeb Tarikeen Watan Ki Kashti Ulatnay Se 14 Afraad Halaak Gogaye.
Ghair mulki khabar agency ke mutabiq haadsa malaysia ke maghribi saahil mein masroof tareen tijarti aabi guzargah abnaye malaka ke qareeb paish aaya.
Jahan ghair qanooni tor par malaysia mein daakhil honay walay tarikeen watan ki kashti ulat gayi jis mein 100 se zayed afraad sawaar they.
Haadsay ke baad muqami mahi gairon ne doobnay walay mutadid afraad ki jaan bachai jab ke is douran 14 afraad ki lashain bhi nikaali gayi jin mein khawateen bhi shaamil hain.
Malaysia ke hakkaam ke mutabiq tarkin watan ki bari tadaad ab bhi lapta hai jinhein talash kiya ja raha hai aur is ke baais halakaton mein mazeed izafay ka bhi khadsha hai.
Muqami media ke mutabiq haadsay ki wajah kashti mein gunjaish se ziyada musafiron ko sawaar karna tha jab ke kashti mein sawaar afraad ki aksariyat ka talluq Indonesia se tha taham hakkaam ki janib se is ki tasdeeq nahi ki gayi hai.
Wazeh rahay ke 20 laakh se zayed afraad rozgaar ke liye ghair qanooni tor par malaysia mein muqeem hain jin ki aksariyat ka talluq hamsaye mulk Indonesia se hai jahan se har saal hazaron afraad rozgaar ki talaash mein tang aur khatarnaak aabi guzar gahon se malaysia mein daakhil hotay hain.
Wazan ki zayadti aur tando taiz lehron ki wajah se aksar kashtiyan ulatnay ke hadsaat paish atay rehtay hain aur is se 2 mah pehlay bhi Indonishin tarikeen watan ki aik kashti ulatnay se 12 afraad halaak hogaye they.
Dollar Ki Qeemat 104 Rupay Se Mutajaviz
Karachi: Interbank Market Mein Aik Hi Roz Ke Douran Dollar Ki Qader Mein 2 Rupay 10 Paisay Tak Izafay Ke Baad Dollar Ki Qeemat 104 Rupay Se Bhi Barh Gayi Hai.
Report ke mutabiq exporters ki janib se American dollars ki barri tadaad mein khareed ke baais market mein Adam istehkaam peda ho raha hai aur dollar ki qeemat 104 rupay 10 pesey tak poanch jaane ke baad open market mein money changers ne dollars ki farokht band kar di hai.
Muashi mahireen ka kehna hai ke rupay ki qader mein kami mulk mein mehengai ki sharah mein izafay ka baais ban sakti hai.
wazeh rahay ke fil-waqt aazmin Hajj hi Saudi Riyal aur American dollars sameit ghair mulki currency ke sab se barray kharedar hain.
State bank ne haal hi mein currency dealers ko is baat ki ijazat di thi ke woh dollars ko Dubai se online bhi Pakistan mein apne bank accounts mein muntaqil kar saktay hain.
Bajaye is ke ke woh pehlay kisi bank mein transfer karen Kyun Ke is tamam amal mein aik haftay ka waqt lag jata tha.
Yeh qadam dealers ki janib se open market mein dollars ki taiz raftaar supply ke mutalbey par uthaya gaya tha.
Doosri janib report ke mutabiq monday ko karobari haftay ke aaghaz par Karachi stock exchange mein hundred index 1400 points ki kami ke sath 33 hazaar points par record kiya gaya..
Waseem Akram Iqbal Qasim Aur Rameez Raja Chairman Board Ke Musheer Honge
Karachi: Chairman PCB Ka Musheer Ban’nay Ke Liye Wasim Akram, Iqbal Qasim Aur Rameez Raja Ke Naam Samnay Aya Gaye.
Cricket Committee Ke Sarbarah Shakeel Sheikh Ka Kehna Hai Ke Governing Board Ne Shehriyaar Khan Ko Ikhtiyar D diya Hai Ke Wo Un Mein Se 2 Ya Phir 3 Ka Intikhab Karlen.
Tafseelaat ke mutabiq Iqbal Qasim ki national bank se retirement ke baad PCB governing board mein koi cricketer baqi nahi raha.
Guzashta dino ijlaas mein kabhi qaumi team ki numaindagi na karne walay log mulki cricket ke ahem faislay karte dikhayi diye.
Is hawalay se tanqeed samnay anay par board ne hosh ke naakhun le liye aur chairman Shehriyaar Khan ko sabiq cricketers ki khidmaat bator musheer haasil karne ka kaha.
Guzashta roz cricket committee ke sarbarah Shakeel Sheikh ne media ko bataya ke Wasim Akram, Iqbal Qasim aur Rameez Raja ke naam zire ghor hain.
Chairman chahain to teeno ya un mein se kisi 2 ko musheer muqar’rar kar satke hain.
Board Karachi aur Lahore se 1,1 eaisy player ki khidmaat haasil karna chahta hai jo jadeed cricket ki barikyon se waaqif ho.
Unhon ne kaha ke zaroorat parney par mazkoorah players ko governing board meeting mein bhi bulaya ja sakay ga.
Rameez aur Wasim Akram commentary waghera ki wajah se ziyada tar waqt mulk se bahar rehtay hain.
Shehriyaar Khan un ki dasteyabi par mulaqaat kar ke ya phir phone par tabadlah khayaal kar satke hain.
Ahem mamlaat par sabiq stars ki tajaweez par phir governing board meeting mein ghhor hoga.
Shakeel Sheikh ne kaha ke sabiq cricketers ki fehrist kaafi taweel magar mazkoorah teeno ka kaafi naam hai Wo apne mashwaron se mulki cricket ko faida pouncha satke hain.
Yaad rahay ke Shehriyar Khan wazeh kar chuke hain ke un ke musheer governing board ke mambar honge na unhein vote dainay ka ikhtiyar haasil hoga..
Mulk Bhar Mein 69th Yom-e-Azadi Intehai Josh-o-Jazbay Ke Sath Manaya Ja Raha Hai
Mulk Bhar Mein Yom-e-Azadi Intehai Josh-o-Jazbay Ke Sath Manaya Ja Raha Hai Jab Ke Is Mauqe Par Raat 12 Bajtay Hi Karachi, Lahore, Islamabad Aur Queta Sameit Deegar Shehron Mein Shandaar Aatish Baazi Ka Muzahira Kiya Gaya.
Mulk bhar mein 69th Yom e Azaadi Shayan shaan tareeqay se manaya ja raha hai.
Din ka Aaghaz Wifaqi Dar-al-hakoomat mein 31 jab ke Sobai Dar-al-hakoomaton mein 21,21 Topon ki Salami se howa jab ke masajid mein Pakistan ki taraqqi aur khushhali ke liye khusoosi duayen ki gayeen.
Jashan e Azaadi ki markazi taqreeb Islamabad ke convention center mein ho rahi hai jis mein Saddar Mamnon Hussain, wazeer e Azam Nawaz Shareef, Army Cheif General Raheel Shareef aur joint Cheif Of Staff Committee General Arshad Mahmood sameit wifaqi wazraa, mimbraan qaumi assembly, senetors aur ghair mulki sfartkaron ki barri tadaad shareek hai.
Taqreeb ka baqaida aaghaz saddar Mamnon Hussain aur wazeer e azam Nawaz shareef ne parcham kushai se kya.
Yom e Azaadi ki markazi taqreeb ke mauqe par Islamabad mein security ke intahi sakht intizamaat kiye gay hain,
Wifaqi dar-al-hakoomat ki eham shahrahon par pak fouj ke dastay tainaat hain jab ke mobile phone service bhi moattal hai.
Karachi mein bhi Mazaar e Quied par guards ki tabdeeli ki purwaqar taqreeb munaqqid hui.
Mazaar e Quied par Governor Sindh Dr.Ishrat ul Ibad Khan, Wazeer e Aala Sindh Syed Qaim Ali Shah sameit mimbraan Sindh assembly ne shirkat kar ke Fatiha khawani ki aur phoolon ki chadar charhai.
Lahore mein bhi Wazeer e Aala Punjab Shahbaz shareef ne Mazaar e Iqbal par haazri di aur parcham kushai ki.
Wazeer e Aala Balochistan Dr. Abdul Malik ne bhi sobai assembly mein parcham kushai ki.
Shumali Waziristan ki tehseel miranshah mein bhi muqami afraad ne Pak Fouj ke jawanon ke sath Qaumi Naghmon par jhoom utthay jab ke Azad Kashmir ke saddar Sardar Yaqoob ne bhi ewaan e saddar mein Sabz Hilali parcham Lahraya.
Yom e Azaadi ke mauqe par gali gali koochy koochy mein azaadi ke jazbay se sarshar shehrion ne cheraghan kiya aur Qoumi Parcham se apne gharon ko sajaya jab ke 13 August ki raat 12 bajtay hi Karachi, Lahore, Queta aur Islamabad sameit deegar shehron mein shandaar aatish baazi ka muzahira kiya gaya aur is mauqe par Aasman roshiniyon se Munawar hogaya,
Mulk ke mukhtalif hisson mein Jashan e Azaadi ki munasbat se programme ka ineqad kiya gaya hai jis mein Bachay, Nojawan, Buzurg sab hi ne mili Naghmon par Raqs kiya.
Yom e Azaadi ke mauqe par Karachi sameit deegar shehron mein Manchaly Nojawan raat ko sarkon par nikal aye aur yom e azaadi ka jashan manaya.
Dosri janib wazeer e azam Nawaz Sharif ne yom e azaadi ke mauqe par qoum ke naam apne pegham mein kaha hai Ke ye din khushi ka bhi hai.
Allah Taala ke huzoor sajda shkar baja laane aur is ehad ko taaza karne ka bhi ke hum muttahid aur yakjaan hokar un maqasid ke liye jadd-o-jehad krte rahenge jin ke liye pakstan haasil kiya gaya tha.
Unhon ne kaha ye shayar mashriq Allama Iqbal ne janoobi Asia ke musalmanoon ke liye ek azad o khud mukhtar riyasat ka khawab dekha hai babaye qoum Quaid E Azam Mohammad Ali Jinnah ne wal’walah angaiz tehreek ke zariye is khawab ko tabeer ki shakal di hai..
Punjab Aur Khyber Pakhtun Khwa Ke Mukhtalif Shehron Mein Zalzalay Ke Jhatkay
Islamabad: Punjab, Khyber Pakhtun Khwa Aur Kashmir Ke Mukhtalif Shehron Mein Zalzalay Ke Shadeed Jhatkay Mehsoos Kiye Gaye Jis Ke Baa’is Logon Mein Shadeed Khauf o Hiraas Phail Gaya Jab Ke Richter Scale Par Zalzalay Ki Shiddat 6.7 Record Ki Gayi.
Report ke mutabiq Islamabad, Lahore aur Peshawar samait mulk ke balai elaqon mein zalzalay ke shadeed jhatkay mehsoos kiye gaye jis ke baad log kalma tayyiba ka wird karte gharon se bahar nikal aaye.
Jin shehron mein zalzalay ke jhatkay mehsoos kiye gaye un mein Islamabad, Lahore, Faisalabad, Muzaffarabad, Sargodha, Boray wala, Sialkot, Gujranwala, Bahawalnagar, vharhi, Nankana sahib shaamil hain jab ke khyber pakhtun khwa ke shehar Peshawar, Mardan, Para chanar, Abbotabad, Hari poor, Mansehra, Battagram, Besham, Ghizer, Lower deer samait Gilgit, Skardu, Chitral mein bhi zalzalay ke jhatkay mehsoos kiye gaye.
Isi terha khyber agency aur is ke mulhiqa elaqon samait Azad Kashmir ke mukhtalif shehron aur Sri nagar mein bhi shehrion ne zalzalay ke jhatkay mehsoos kiye.
Zalzala pema markaz ke mutabiq richter scale par zalzalay ki shiddat 6.7 record ki gayi jab ke zalzalay ki geherai 200 kilometer aur markaz Afghanistan tajkstan border tha, mulk ke mukhtalif shehron mein zalzalay ke jhatkay 30 second tak mehsoos kiye gaye..
Microsoft Aaj Naya Operating System’ Windows 10 Launch Kar Raha Hai
Washington: Computer Software Bananay Wali Duniya Ki Sab Say Barri Company Microsoft Aaj Naya Operating System’ Windows 10 Launch Kar Rahi Hai.
Ghair mulki khabar agency ke mutabiq’ windows 10 duniya bhar 190 mumalik mein dastyab hoga.
Isay taweel al muddat bunyadon par istemaal kiya ja sakega jis ke liye is mein update faraham kiye jatay rahenge.
Windows 7 aur Windows 8.1 istemaal karne walay sarfeen is naye operating system ko muft download kar sakenge taham computer banany walay idaron ke liye ye system muft nahi hoga.
Market mein microsoft se mutabqat rakhnay walay computer aur tablets mein windows 10′ pehlay se hi mojood hoga.
Windows 10 alag se farokht ke liye rawan baras ke ekhtataam taq dastyab ho sakayga.
Micorsoft ke mutabiq Windows 10 ki tayari mein is baat ka khayaal rakha gaya hai ke bilkhushoos smart phones aur tablets ke sarfeen is se istifada kar saken jis ke liye is naye operating system mein applications ki tayari par khusoosi tavajja di gayi hai.
Mahireen ka kehna hai ke microsoft ke windows system mein mojood applications mobile phones aur tablets ke sarfeen ko apni taraf mutwajjah karne mein ziyada kamyaab nahi hosaki hai.
Is tanazur mein Google ka android system aur apple ka IOS market mein bohat ziyada maqbool hai taham Windows 10 ki kamyabi ki soorat mein Microsoft smart phones aur tablets ke sarfeen ka aetmaad bhi haasil karne mein kamyaab ho sakti hai..
