Sport
World T20 Mein Pakistan Ka Fatihana Aaghaz
Culcutta: Pakistan Ne T20 World Cup Ke Match Mein Bangladesh Ko 55 Runs Se Shikast Dey Kar Asia Cup Ka Badla Le Liya.
Calcutta ke Eden Garden Cricket Stadium mein khailay gaye T20 World Cup ke match mein Green Shirts ne pehlay batting karte hue muqarara 20 overs main 5 Wickets ke nuqsaan par 201 runs banaye jis ke taqub mein Bangladesh 6 wickets par 146 runs hi bana saki.
Bangladesh ko pehlay hi over mein 1 wicket ke khasaray ka saamna karna para jab Mohammad Aamir ne apni 3rd ball per Soumya Sarkar ko Clean Bold kiya jis ke baad Jareh mizaaj Sabbir Rahman bhi 25 runs bananay ke baad Shahid Afridi ki ball par bold hogaye.
Teesray out honay walay Batsman Tamim Iqbal they jo sirf 24 runs hi bana sakay jab ke Mahmudullah 4 runs bana kar pavellion lautay.
Mushfiq Ur Raheem aur Shkib Al Hasan ne 5th wicket ke liye 39 runs ki shiraakat daari qaim ki Mushfiq ur Raheem 18 runs par Mohammad Aamir ka shikaar banay.
Mohammad Mithun ko Mohammad Irfan ne 2 runs par pavellion bheja jab ke Shakib Al Hasan 50 runs par na qabil e shikast rahay.
Pakistan ki janib se Captain Shahid Afridi aur Mohammad Aamir ne 2, 2 jab ke Immad Wasim aur Mohammad Irfan ne 1,1 wicket haasil ki.
Shahid Afridi ko jarehana inning khailnay aur 2 wickts haasil karne par Man Of The Match se nawaza gaya.
Is se qabal Qaumi Team ke Captain Shahid Afridi ny Toss jeet kar batting ka faisla kiya to Opening Batsman Sharjeel Khan aur Ahmed Shahzad ne Team ko umda Aaghaz faraham kiya dono Batsmans ne jarehana andaaz mein inning ka aaghaz kiya to 26 ke majmoi score par Sharjeel Khan 10 balls par 18 runs bana kar Arafat Sunny ki ball par bold hogaye
Jis ke baad Ahmed Shahzad aur Mohammad Hafeez ny 2nd wicket par 95 runs ki shiraakat qaim ki dono Batsmans ne ground ke charon atraaf dilkash stroke khailay aur team ka majmoa 121 tak pouncha to Ahmed Shahzad 39 balls par 52 runs bana kar Sabbir Rahman ki ball par catch out hogaye Unhon ny apni inning mein 8 4s lagaye.
Wickts girnay ke bawajood qaumi batsmans ki jarehana batting jari rahi aur Captain Shahid Afridi aur Mohammad Hafeez ne 3rd wicket par 42 runs ki shiraakat qaim ki aur 17th over mein team ka majmoi score 163 tak pouncha to Mohammad Hafeez 42 balls par 64 runs bana kar out hue jis mein 2 6s aur 7 4s shaamil they jab ke Umar Akmal baghair koi runs banaye Taskeen Ahmed ka shikaar banay.
Captain Shahid Afridi last over mein apni Half Century se sirf aik runs doori par catch out hue unhon ny 4 4s aur 4 6s ki madad se 19 balls par 49 runs banaye.
Shoaib Malik 14 aur immad Wasim baghair koi ball khailay not out rahay.
Bangladesh ki janib se Taskeen Ahmed aur Arafat Sunny ne 2, 2 aur Sabbir Rahman ne 1 wicket haasil ki..
World T20 Cup Ke 1st Match Mein Newzea Land Ne India Ko Shikast Deydi
Nagpor: T20 World Cup Ke Super 10 Marhalay Ke 1st Competitions Mein Newzea Land Ne India Ko 47 Runs Se Shikast Deydi.
Nagpor mein khailay gaye World Cup Super 10 Marhalay ke 1st match mein Newzea Land ne India ko jeet ke liye 127 runs ka Target diya jis ke jawab mein India ki poori team 79 runs par pavellion lout gayi.
India ki batting start se hi mushkilaat ka shikaar rahi aur 3 overs mein 12 runs par 3 players pavellion lout gaye they.
Shikhar Dhawan 1, Rohat Sharmaa 5 aur Suresh Raina 1 runs bana kar out hue jab ke 26 runs ke majmoi score par Yuvraj Singh bhi 4 runs bana kar out hue.
Virat Kohli ki himmat bhi 23 runs par jawab de gayi jab ke Hardik Pandya 1, Ravindra Jadeja 0, aur Ashwin 10 runs bana kar out hue.
Captain Dhoni Aakhri dam tak wicket par mojood rahay lekin 18th over mein Mitchell Santner ne inhen 30 runs par pavellion bhej diya.
Newzea Land ki janib se Mitchell Santner 4, Ish Sodhi 3, Nathan McCullum 2 aur Adam Milne aik wicket haasil karne mein kamyaab rahay.
Is se qabal Newzea Land ke Captain Kane Williamson ne Toss jeet kar pehlay batting ka faisla kiya aur muqarara 20 overs mein 7 Wickets ke nuqsaan par 126 runs banaye.
Kiwis ki janib se Martin Guptill ne pehli hi ball par Ashwin ko chakka raseed kar kay mega event ka aaghaz kiya lekin doosri hi ball par Ashwin ne inhen out kar kay hisaab chukta kar diya 3rd par batting ke liye anay walay Colin Munro bhi aik chakka maarny ke baad Ashish Nehra ka shikaar banay.
Captain Williamson bhi 8 runs hi bana sakay jab ke Ross Taylor achi form mein nazar arhay they lekin woh 10 runs par raina ke hathon run out hogaye.
Corey Anderson ne bharpoor muzahmat ki lekin un ki himmat bhi 34 runs par jawab dey gayi baad mein anay walay players mein Mitchell Santner 18, Grant Elliott 9 runs bana kar out hue jab ke Luke Ronchi 21 runs par not out rahay.
India ki janib se Ashwin, Nehra, Bumrah, Raina aur Jadeja ne 1,1 wicket haasil ki.
Wazeh rahay ke T20 World Cup ke Super 10 marhalay mein South Africa, Srilanka, West Indies, England aur qualifying team Afghanistan group 1′ jabkay Pakistan , India , Newzea Land, Australia aur Bangladesh group 2′ mein shaamil hain.
Asia T20 Pakistan Ne UAE Ko Shikast Dedi
Dhaka: Asia Cup T20 Ke 4th Match Mein Pakistan Ne UAE Ko 7 Wickets Se Shikast Dedi.
Mirpor ke Sheer Bangla stadium mein khailay gaye Asia T20 Cup ke 4th match mein UAE ne pehlay batting karte hue total 20 overs mein 6 wickets ke nuqsaan par 129 runs banaye jis ke jawab mein Pakistan ne 18.4 over mein 3 wickets ke nuqsaan par target haasil kar liya.
Mohammad Hafeez aur Sherjeel Khan ne ining ka aaghaz kiya lekin UAE ke Captain Amjad Javed ne 3 overs main Sherjeel Khan 4, Khurram Manzoor 0 aur Mohammad Hafeez ko 11 runs par pavellion bhej kar match mein sansani peda kar di taham Umar Akmal aur Shoiab Malik ne 4th wicket ke liye 114 runs ki shirakat daari qaim kar kay Pakistan ko jeet se humkinar karaya.
Shoiab Malik 3 6s aur 7 4s ki madad se 63 jab ke Umar Akmal 3 6s aur 2 4s ki madad se 50 runs par not out rahay.
Is se qabal UAE ke Captain Amjad Javed ne Toss jeet kar pehlay batting ka faisla kiya, Rohaan Mustafa aur Mohammad Kaleem ne ining ka aaghaz kiya lekin dono player aik aik runs bana kar pavellion lout gaye jis ke baad Mohammad Shahzad batting ke liye aaye aur 5 runs bana kar Mohammad Irfan ka nishana banay.
Shaiman Anwar aur Usman Mushtaq ne 4th wicket ke liye 29 runs ki shiraakat daari qaim ki.
Mushtaq 9 runs bana kar pavellion lautay jab ke Shaiman Anwar ne 5th wicket ke liye Mohammad Usmaan ke sath mil kar 31 runs banaye aur Shaiman 46 runs bana kar out hue.
Mohammad Usmaan ne 6th wicket ke liye Captain Mohammad Amjad ke hamrah mil kar 46 runs ki shandaar shiraakat daari qaim kar kay team ka score mustahkam kiya.
Mohammad Usman 21 runs bana kar out hue jab ke captain 27 runs par not out rahay.
Pakistan ki janib se Mohammad Aamir ne Shandaar bowling ka muzahira karte hue 4 overs mein 6 runs de kar 2 wickets, Mohammad Irfan ne bhi 2 jab ke Mohammad Sami aur Shahid Afridi ne 1,1 wicket haasil ki.
Wazeh rahay ke Pakistan aur UAE pehli martaba T20 mein aik dosray ke mad-muqabil aye hain is se qabal dono Teams mein 3 one day matches bal tarteeb 1994, 1996 aur 2015 mein khailay ja chukay hain.
Shahid Afridi ne Ab tak 85 T20 ining mein 66 6s maray hain 3 mazeed 6s se woh David Warner ( 67 ) aur Martin Guptil ( 68 ) ko peechay chortay hue all time list mein 4th number par poanch jayenge..
New Zealand Ne 3rd T20 Match Mein Pakistan Ko Shikast Dedi
Wellington: New Zealand Ne 3 Matches Par Mushtamil T20 Series Ke Faisla Kun Match Mein Mehman Pakistan Ko Shikast Dekar Series Apne Naam Karli.
Wellington ke WestpacTrust Stadium mein khailay gaye match mein New Zealand ne pehlay batting karte hue 20 overs mein 5 wickets ke nuqsaan par 196 runs banaye jis ke taqub mein Pakistan ki poori team 101 runs per pavilion lout gayi.
Target ke taqub mein Qaumi Team ko pehla nuqsaan 7 runs par howa jab Mohammad Hafeez 2 runs bana kar catch out hue jab ke teesray over ki 1st ball per Ahmed Shahzad bhi 8 runs bana kar pavellion lout gaye.
Mohammad Rizwan 4, Shoiab Malik 14, Umar Akmal 5, Shahid Afridi 8 aur Ammad Wasim bagair koi runs bnaye out hue.
Girti wickets ko sahara deny ke liye wicket keeper Sarfaraz Ahmed ne mazahmat ki koshish ki lekin woh bhi 92 ke total score per himmat haar gye unhon ney 5 4s ki madad se 36 balls par 41 runs bnaye,
Anwar Ali 8 aur Wahab Riaz 1 runs bana kar out hue.
New Zealand ki janib se Grant Elliott ne 3, Corey Anderson aur Adam Milne ney 2,2 jab ke Trent Boult ne 1 wicket haasil ki.
Is se pehlay batting karte hue kiwi opener ne ek bar phir jarihana batting karte hue team ko 57 runs ka Aaghaz faraham kiya.
6th over k liye Shahid Afridi Aeye aur pehlay hi over mein Martin Guptill ko Umar Akmal ke hathon catch out kara diya.
Unhon ney 19 balls par 42 runs ki jarehana inning kheli. 7th over mein 62 ke total score par Colin Munro Mohammad Rizwan ki shandaar through par run out hue.
11th over mein Wahab Riaz ney kiwi Captain Kane Williamson ko 33 runs par out kar diya Shoiab Malik ne un ka catch thaama.
Ross Taylor 6 runs bana kar retired hurt ho gaye. Corey Anderson ne 27 balls par jarehana half century score ki.
Grant Elliott 14 balls par 19 runs bana kar run out hue jab ke Luke Ronchi apna khata khole baghair pehli hi ball par out ho gaye lekin aik taraf se Corey Anderson ne shandaar batting jari rakhi aur 42 balls par 82 runs ki not out inning kheli.
Pakistan Ne 1st T20 Match Mein New Zealand Ko Shikast Dedi
Auckland: Pakistan Ne Captain Shahid Afridi Ki All Rounder Karkardagi Ki Badolat New ZeaLand Ko Pehlay T20 Match Mein 16 Runs Se Shikast Day Kar Series Mein Bartari Haasil Karli.
Auckland ke Eden Park mein khailay gaye match mein kiwi team ke captain Kane Williamson ne toss jeet kar Shahid Afridi ko pehlay khailnay ki dawat di.
Pakistan ki janib se Ahmed Shahzad aur Mohammad Hafeez ne batting ka Aaghaz kiya.
Dono batsman ne mohtaat batting ka muzahira karte hue 4 overs mei bina kisi nuqsaan ke 23 runs banaye taham 4th over mein Ahmed Shahzad ne Adam Milne ko 1 4s aur 6s Raseed karne ke baad 5th ball par 1 aur long shot khailnay ki koshish mein Elliott ko catch thama baithy.
Wo 14 runs bana kar out honay walay 1st Pakistani batsman they.
Sohaib Maqsood score mein koi izafah kiye baghair 0 par out hue
3rd out honay walay batsman Shoiab Malik they jnhon ne Hafeez ke sath mil kar 3rd wicket ki shiraakat mein score ko 78 runs tak pohanchaya aur 20 runs bana kar Santner ki ball par out hue.
Mohammad Hafeez ne zimma daarana batting ka muzahira karte hue 47 balls par 2 6s aur 8 4s ki madad se 61 runs banaye aur Adam Milne ki ball par out hue.
Umar Akmal 24 runs bana kar out honay walay 5th player they.
Captain Shahid Afridi ne jarehana batting ka muzahira karte hue Pakistan ka score 147 runs tak pohanchaya unhon ne 8 balls par 2 4s aur 2 6s ki madad se 23 runs banaye lekin apne mizaaj ke mutabiq khailnay ki koshish mein Trent Boult ki ball par Kane Williamson ke hathon catch out hue.
Sarfraz Ahmed 2 runs bana kar Milne ka shikaar banay jabkay Ammad Wasim 18 runs bana kar out hue.
Wahab Riaz 2 aur Umar Gul 1 run bana kar not out rahay.
Pakistan ne 20 overs mein 8 wickets ke nuqsaan par 171 runs banaye aur maizban New Zealand ko jeet ke liye 172 runs ka target de diya.
New Zealand ke Adam Milne 4 wickets haasil karkay kiwis ki janib se top bowler rahay, Santner ke hissay mein 2 wickets ayen.
172 runs ke target ke taqub mein kiwis ke opening batsman Martin Guptill 2 runs bana kar 9 ke total score per run out hue jabkay Shahid Afridi ne starting over mein Kane Williamson ka 1 Asaan catch drop kiya.
Colin Munro 27 balls par jaarehana 56 runs bana kar out hue unhon ne 6 6s aur 2 4s lagaye.
Corey Anderson 0 par Ammad Wasim ka shikaar banay.
Grant Elliott 3 aur Luke Ronchi baghair koi run banaye Shahid Afridi ke hathon out hue jabkay Santner bhi 0 per hi Umar Gul ko wicket de baithy.
Todd Astle 138 ke total par 1 run ka izafah karkay Umar Gul ki 2nd wicket ban gaye jabkay Matt Henry 10 runs bana kar Mohammad Aamir ki International cricket mein wapsi ke baad pehla shikaar banay isi ke sath Aamir ki International cricket mein 100 wickets bhi mukammal ho gayen.
Last over mein Kane Williamson 70 aur Trent Boult 0 par Wahab Riaz ki ballspar out hue.
New Zealand ki All Team 155 runs bana kar out hui yun Pakistan 16 runs se Winner ban gaya.
Pakistan ki janib se Wahab Riaz ne 3, Umar Gul aur Shahid afridi ne 2,2 jabkay Aamir aur Amad Wasim ne 1,1 wicket haasil ki.
Shahid Afridi ko All Round karkardagi par match ka behtareen player qarar diya gaya.
1st T20 match ke liye dono teams In players per mushtamil Thin.
Pakistan Team..
Shahid Afridi (Captain), Ahmed Shahzad , Mohammad Hafeez , Sohaib Maqsood, Shoiab Malik, Umar Akmal , sarfaraz Ahemd, Ammad Wasim, Wahab Riaz , Umar Gul aur Mohammad Aamir
New Zealand Team..
Kane Williamson (Captain), Martin Guptill, Colin Munro, Corey Anderson, Grant Elliott, Luke Ronchi, Mitchell Santner, Todd Astle, Adam Milne, Matt Henry, Trent Boult
Pakistan aur New Zealand ke darmain Series ka 2nd T20 match 17 Jan, Sunday ko Seddon Park mein khela jayega .
T20 World Cup 2016 Ka Schedule Jari
Dubai: International Cricket Council Ne T20 World Cup 2016 Ke Schedule Ka Elaan Kar Diya Jab Ke Pakistani Team Apna 1st Match Riwayati Hareef India Ke Khilaaf 19 March Ko Khalega.
ICC ki janib se schedule ke mutabiq T20 world cup Agly saal 8 March se 3 April tak India mein khela jayega jis mein 16 teams shirkat kar rahi hain jab ke 8 teams ko 2 group mein taqseem kiya gaya hai aur Qualifying round mein shaamil 8 teams bhi 2 groups mein taqseem hain.
Group A mein South Afriqa, England , west indies aur Srilanka shaamil hain jab ke group B mein Pakistan , India , newzea land aur Australia ki teams hongi.
Qualifying group A mein Bngladish, Holland , Ireland aur Amman jab ke group B mein Zimbabwe , Scot Land, Hong kong aur Afghanistan ki teams hain.
Qualifying group se kamyaab honay wali 2 teams World Cup ke matches mein ibtidayi 8 teams ko join karengi.
ICC ke mutabiq World Cup ke tamam matches Banglore, Chennai, Dharam Shala, Calcutta , Mohali, Mumbai , Naag Poor aur New Dehli mein khailay jayenge jab ke 30 aur 31 March ko Mumbai aur New Dehli mein Semi final matches honge taham ICC ka kehna hai ke Semi final mein Pakistan ke pounchanay ki soorat mein woh match Mumbai ke bajaye New Dehli mein hoga.
Qualifying round ke baad T20 world cup 2016 ka baqaida Aaghaz India aur new zealand ke darmain match se hoga jo 15 March ko Naag poor mein khela jayega jab ke Pakistan maizban India ke sath 19 March ko Dharam Shala mein takrayega.
T20 World Cup ki difai champion Srilankan team 17 March ko Calcutta mein qualifying team se event ka pehla match khalegi..
Pakistan Super League Ki Teams Nelaam
Lahore: Pakistan Super League ( PSL ) Ke Liye Teams Ki Nelami Ka Amal Mukammal Ho Gaya Hai Jis Mein 5 Idaron Ne Aindah 10 Saal Ke Liye 93 Million Dollars Mein 5 Teams Khareed Li Hain.
Lahore ke Qazafi stadium mein press conference se khitaab karte hue Najam Sethi ne kaha ke ‘League’ ka asal sponser Habib Bank LTD hoga aur league ka poora naam HBL Pakistan Super League hoga.
Sponser ki muddat 3 saal hogi jabkay nashriyat ke haqooq mutahidda arab amarat ke nashriyati idaray Take Front ko diye gay hain.
Najam Sethi ne kaha ke queta ki team ko Umar Associeats ne khareeda, Peshawar ki team ko Haier ke Javed Afridi, Karachi ki team ARY group, Islamabad ki team ko Leo Nine global aur Lahore ki team ko Qatar Oil ne khareeda hai.
Teams ki nelami mein sab se mehngi team Karachi ki hai jise ARY group ne 26 million dollar mein khareeda.
Lahore ki team ko qatar oil ne 25.1 million dollar mein, Peshawar ki team Haier ke Javed Afridi ne 16 million dollar, Islamabad ki team 15 million dollar mein Leo Nine global sports ne kharidi jab kay Queta ki team 11 million dollar mein Umar Associeats Karachi ne kharidi.
Franchise companies se 10 saal ka moahida kiya gaya hai taham 3 saal baad koi bhi Franchise dastbrdar ho sakti hai.
Najam sethi ka kehna tha ke PSL ka Agla marhala Coaches ki taenati ka hai jo aglay 10 din mein mukammal ho jayega jis ke baad players ke daraft honge jis se aglay marhalay mein hatmi shakal di jayegi.
Unhon ne Pakistan Super League ko Young players ke liye International style ki cricket seekhnay aur preasure mein performance dikhaane ka gur seekhnay ka behtareen mauqa bhi qarar diya.
Chairman executive committee Najam sethi ne is Impression ko ghalat qarar diya ke PSL pehlay saal khasaray ka saamna keregi.
League ke liye players ki nelami ka amal mumkina tor par 19-21 decemeber ke darmain hoga jahan draft system ke zariye har Franchise 1 million dollar tak kharch kar sakti hogi.
PSL ka 24 matches ka ineqad Sharjah aur Dubai mein 4 feb se 23 feb tak kheli jayegi..
Pakistan Ne England Ko Aakhri Test Mein Shikast Day Kar Series Jeet Li
284 Runs Ke Target Mein England Ki Team 156 Par Out,
Shoiab Malik Ki 3 Aur Yasir Shah Ki 4 wickets..
Sharjah: Pakistan ne Sharjah test mein England ko 127 runs se shikast day kar series apne naam kar li hai.
Sharjah mein khailay janey walay match mein England ki team 284 runs ke target ke taqub mein 156 runs par dhair hogayi.
England ki janib se Alastair Cook 63 runs bana kar top score rahay un ke ilawa Moeen Ali aur Adil Rasheed ne 22,22 runs ki ining khelain.
Pakistan ki janib se Yasir Shah ne 4, Shoiab Malik ne 3, Zulfiqar Babar ne 2 aur Rahat Ali ne 1 wicket hasil ki.
Pakistan ne match ki pehli ining mein 234 runs banaye they jis mein Misbah Ul Haq 71 runs ke sath top score they jab kay 2nd ining mein Mohammad Hafeez ne 151 runs ki shandaar inning kheli.
Pakistan ka 2nd ining mein total 355 score raha.
England ki team ne 1st ining mein 306 runs banaye James Taylor 76 runs ke sath top score rahay.
1st ining mein Rahat Ali ne 2, Yasir Shah ne 3, Shoiab Malik ne 4 aur Zulfiqar Babar ne 1 player ko out kiya.
England ki team ko 2nd ining mein jeet ke liye 284 runs ka target mila magar all team 156 runs par out ho gayi.
Alastair Cook 63 runs ke sath top score rahay.
Yasir Shah ne 4, Shoiab Malik ne 3, Zulfiqar Babar ne 2 aur Rahat Ali ne 1 wicket haasil ki.
Pakistan ne 3 matches ki series 0-2 se apne naam karli hai.
Sharjah test mein Pakistani spin bowling ne England ko khul kar khailnay nahi diya.
Leg spinner Yasir Shah ne Sharjah stadium mein 7 shikaar kiye.
Unko behtareen performance par man of the series aur Mohammad Hafeez ko man of the match ka award diya gaya.
ICC Champions Trophy 2017 Ke Liye 8 Teams Ka Elaan
Dubai: International Cricket Council (ICC) Ne Champions Trophy 2017 Ke Liye 8 Teams Ka Elaan Kar Diya Jis Mein Pakistan Ki Team Bhi Shaamil Hai.
Report ke mutabiq ICC ne champions trophy 2017 ke liye 8 teams ke naam ka elaan kar diya hai jab ke champions trophy ke liye Cut-off date 30 September 2015 muqarrar thi.
ICC ki janib se elaan karda date 30 September tak west indies 9th position par honay ki wajah se qualify nahi kar saki aur is baar west indies ki jagah Bangladesh ne leli hai jo 2006 ke baad champions trophy mein hissa legi.
ICC point table mein ranking ke hisaab se elaan karda naam mein Australia, India, South Africa, Newzeland, Srilanka, England, Bangladesh aur Pakistan shaamil hain.
ICC Champions Trophy 1st June 2017 se 18 June ke darmiyan England mein hogi jis mein 4,4 teams ke 2 group honge jab ke tournament mein 15 match khailay jayenge.
Wazeh rahay last champions trophy 2013 mein England mein kheli gayi thi jo India jeetnay mein kamyaab howa tha..
Mulk Ke Halaat Behtar Ho Rahay Hain Super League Pakistan Mein Hoti To Buhat Behtar Hota
Lahore: National T20 Cricket Team Ke Captain Shahid Khan Afridi Ka Kehna Hai Ke Mulik Ke Halaat Behtar Ho Rahay Hain Super League Pakistan Mein Hoti To Buhat Behtar Hota.
Report ke mutabiq Pakistan T20 team ke captain Shahid Afridi ne kaha hai ke qaumi T20 tournament mein bohat zabardast cricket hui aur T20 world cup se pehlay bohat acha Combination banayga jab ke Pakistan super league munaqqid karne ka sara Credit PCB ko jata hai.
Unhon ne kaha ke mulk ke halaat din badan behtar ho rahay hain.
Bahar ke Players ko achi Offers hui to woh zaroor khailnay ayenge jab ke sonay par sahaga wali baat hoti agar super league Pakistan mein hoti.
Taham board ki janib se aisay faislay honay chahiye jis se anay walay cricketers ko faida ho.
Shahid Afridi ka kehna tha ke Pakistan ne hamesha mushkil waqt mein India ka sath diya aur wahan ki awam bhi dono mumalik ko cricket khelta dekhna chahti hai lekin asal masla wahan ki hukoomat ka hai.
Unhon ne Ahmed Shahzad ko shadi par mubarakbaad dete hue kaha ke Allah se dua hai ke woh khush rahay aur jeevan saathi ke sath pyaar o Muhabbat se zindagi guzaray..
