Mulk Mein 6 Saal Se Weraan Maidan Kal Se Harey Bharay Hongay

 Lahore: Mulk Mein Aalmi Cricket Na Honay Ke Baais 6 Saal Se Weraan Maidan Kal Se Harey Bharay Hongay.

Pakistan aur zimbabwe ke darmiyan kal T20 match series ka aaghaz hoga jab ke match Pakistani waqt ke mutabiq shaam 7 bachay shuru hoga.

Match se qabal dono teams ne Qazafi stadium mein bharpoor practice ki is mauqe par Pakistan ke sabiq aur Zimbabwe ke mojooda coach Dav Whatmore ne apni team ko fielding aur batting ke gur sikhayiye.

Pehla T20 match dekhnay ke liye anay walay shaiqeen ko PCB hakkaam ki janib se hadaayat ki gayi hain ke woh 5 bujey se qabal stadium pahonch jayen aur mehman team ki ground mein aamad ke baad shaiqeen ka dakhla band hoga.

Doosri janib security sorat e haal ke baais Qazafi stadium ke bahar aur atraaf intehai sakht intizam kiye gaye jis mein police, Elite Force aur rangers ke ahelkaar faraiz injaam denge.

Mehman team ko hotel se ground tak laane ke liye rastay mukammal seal honge aur security forces ke hisaar mein mehman team ko Qazafi stadium laya jayega.

Wazeh rahay ke Pakistan aur Zimbabwe ke darmiyan 2 T20 aur 3 ODI matches par mushtamil series kheli jayegi.

Mobile Sims Ki Biometric Verification Deadline Khatam

 Islamabad: Qaumi Action Plan Ke Tehat Mobile Sims Ki Biometric Verification Karwanay Ki Deadline Khatam Ho Gayi Hai Aur Pakistan Telecommunications Authority (PTA) Ne Khabardaar Kiya Hai Ke Agar Ab Koi Gair Tasdeeq Shuda Sim Mumkina Takhreeb Kaari Mein Istemaal Hui To Is Ki Zimma daar Is Ki Cellular Company Hogi.

Khayaal rahay ke Interior Minister ne mobile sims ki biometric tasdeeq ki muddat mein 15 May tak ki tosee ki thi jo guzashta raat khatam hogayi hai.

Report ke mutabiq PTA ka kehna hai ke ye faisla kar liya gaya hai ke ghair tasdeeq shuda sim dehshat gardi ke kisi waqeye mein istemaal hui to is cellular company ke khilaaf karwai ki jayegi.

Mulk bhar mein ab tak 7 crore mobile sims ki biometric tasdeeq ka amal mukammal howa hai jabkay 2 crore ghair registered sims ko bock kar diya gaya.

Wazeh rahay ke PTA ne is se qabal mobile sims ki tasdeeq ke liye 12 May tak ka waqt diya tha.

PTA officers ne gair tasdeeq shuda sims ki biomatric tasdeeq ke liye sarfeen ko aik mauqa aur faraham karte hue inhen mazeed mohlat dedi thi.

PTA ne kaha tha ke aisi tamam sims jo ke ghair tasdeeq shuda hain band kar di jayengi.

PTA ka mazeed kehna tha ke beron mulk muqeem Pakistanio ne muqami mobile number jaari rakhnay ki darkhwast ki thi jis ke baais mazkoorah faisla kiya gaya tha.

Idaray ki janib se mazeed kaha gaya tha ke sarfeen ko sms ke zariye sims ki registration ke liye kaha jaye ga aur sarfeen ko chahiye ke sms mlitay hi sim registration karwa lain.

PTA ke mutabiq is waqt tak 7 crore 20 laakh sims ki biometric tasdeeq ki ja chuki thi aur yeh sims 4 crore 60 laakh shanakhti cards par jari huien.

yaad rahay ke mobile phone sims ki biomatric tasdeeq ka amal January mein qaumi action plan ke tehat shuru howa tha jis ka pehla marhala 26 feb ko mukammal howa jabkay dosra marhala 14 April ko mukammal hona tha taham is ki deadline mein 15 May tak ka izafah kiya gaya tha.

Telecom operators Mobilink,Ufone,Telenor,Zong aur Warid ne hakoomati hadaayat par 13 January ko sims ki biometric tasdeeq ka amal shuru kiya tha taakay mulk mein dehshat gardi ki rok thaam ko mumkin banaya jasakay.

PTA ke mutabiq mulk mein mobile phone sarfeen ki tadaad 14 crore tak pahonch chuki hai jin mein se 10% ke paas post pad Connections hain jin ke baray mein hukoomat ka khayaal hai ke un ki biomatric system ke zariye dobara tasdeeq ki zaroorat nahi..

Aaj Mulk Bhar Mein Shab-E-Mairaaj Aqeedat O Ehtram Se Manayi Jayegi

 Masajid Mein Ulma karaam Safar Mubarak Ki Fazeelat Bayan Karenge Aur Masajid Mein Khusoosi Ebadaat Ka Ahtimaam Kiya Jayega.

Aaj Shab-e-Mairaaj ke mauqe par mulk bhar mein khusoosi ebadaat aur Mahafil ka ihtimaam kiya jayega.

Masajid mein ulma e karaam is mubarak raat ki fazliat ke hawalay se khutbaat bhi denge.

Rajab ki 27 raat ko khuday-e buzurag o bartar ne apne pyare Rasool Nabi Akhir Ul Zaman ko sharfay mairaaj ataa kiya.

Raat ke mukhtasir arsay mein Masjid Haraam se Masjid Aqsa tak ke safar ka Sharf bakhsha aur phir saaray asmano ke darwazay apne Rasool par khol diye.

Aaj is babarkat raat ke hawalay se mulk bhar mein khusoosi ebadaat ka ehtimaam kiya jayega.

Masajid aur gharon mein khusoosi Mahafil hongi aur Musalman islam is raat ki Barkaat aur Fayooz samaitenge.

Is mauqe par watan Aziz ke liye khusoosi duayen bhi ki jayengi.
Masajid ke bahar security ke sakht intizamaat bhi kiye jayenge..

Saneha Safoora Par Mulk Bhar Mein Yom-E-Soug

 Saneha Safoora Par Mulk Bhar Mein Yom-E-Soug Manaya Ja Raha Hai Jab Ke Sindh Bhar Mein Nizaam Zindagi Moattal Hai.

Guzishta roz Karachi ke ilaqay Safoora goth mein musafir Bus mein 44 afraad ke jaan’bahaq honay par mulk bhar mein yom e soug manaya ja raha hai.

Jis ke tehat ahem sarkari name sarkari aur niji imaarton par qaumi parcham surangoon rahay ga taham Sindh bhar mein nizaam zindagi mukammal tor par maflooj hai.

Karachi mein shehar ke beshtar petrol pump aur CNG stations band hain jis ki wajah se roads par public tansport intehai kam hai.

Shehar ke tamam karobari marakaz, Shops, Offices, aur niji taleemi idaray band hain.

Jamea Karachi aur wifaqi urdu university samait tamam sarkari aur niji jamiyaat mein aaj honay walay papers mansookh kar diye gaye hain.

Karachi ki tarha Sindh ke deegar shehar Haiderabad,Mirpor Khaas,Sukkur,Rohrhi,Nawab Shah,Badeen,Sanghar,Daud,Dadu,Naushahro Feroz,Mehar,aur Jacobabad mein bhi soug ka samaa hai..

Karachi Mein Bus Par Firing Se 43 Afraad Jaan Bahaq Aur 25 Zakhmi Ho Gaye

 Karachi: Safoora Goth Ke Qareeb Bus Par Namaloom Afraad Ki Firing Se Jaan’bahaq Afraad Ki Tadaad 43 Ho Gayi Hai Jis Mein Khawateen Aur Bachay Bhi Shaamil Hain.

Report ke mutabiq Karachi mein khawateen aur bachon samait 60 se zayed afraad bus ke zariye Safoora goth scheme 33 se Aisha Manzil ja rahay thay ke Safoora chowrangi ke qareeb dehshat gardon ne bus ko rok kar pehlay driver ko nishana banaya jis ke baad musafiron par khudcar hathyaaron se firing kar di.

Waqeye ki ittila mlitay hi imdadi teams ne zakhmion ko qareebi hospitals mein muntaqil kardiya.

IG Sindh Ghulam Haider Jamali ne 43 afraad ke jaan’bahaq honay ki tasdeeq kar di hai Jin mein 27 mard aur 16 khawateen shaamil hain.

Hospitals mein zair e ilaaj kayi zakhmion ki haalat intehai tashweesh naak hai jis ki wajah se jaan bahaq afraad ki tadaad mein mazeed izafay ka khadsha hai.

Ghulam Haider Jamali ka kehna tha ke waqeye mein mulawis dehshat gard 4 motor cycles par aaye thay aur unhon ne 9MM pistol ka istemaal kiya.

Jaye waqooa se milnay walay shawahid ki madad se dehshat gardon ke khilaaf tehqiqaat bhi shuru kar di gayi hain aur inhen jald griftar kar ke saza di jayegi.

Doosri janib Islamabad mein mojood wazeer e aala Sindh Qaim Ali Shah ne waqeye ka notice letay hue ilaqa SHO aur DSP ko moattal kar diya jab ke IG Sindh se waqeye ki report bhi talab karli hai..

Pakistan Ne India Ko Shikast Dekar Asian Snooker Championship Jeet Li

 Kuala Lumpur: Pakistan Ke Hamza Akbar Ne India Ke Pankaj Advani Ko Shikast Dekar Asian Snooker Championship Jeet Li.

Malaysia mein khelay gaye asian snooker championship ke final mein Pakistan ke Hamza Akbar ka muqaabla india ke Pankaj Advani se tha.

Dono players ki janib se 13 frame par mushtamil is muqablay mein bharpoor khail ka muzahira kiya gaya aur 12th frame tak dono ke darmiyan maqabala 6-6 frame se barabar tha.

Frame 13th  ke khail ki ibtida mein Pankaj ka palra bhaari nazar araha tha ta’hum phir Hamza ne bharpoor khail ka muzahira karte hue na sirf frame mein fatah haasil ki balkay asian snooker championship bhi apne naam karli.

Wazeh rahay ke Faisalabad se talluq rakhnay walay Hamza Akbar ne pehli martaba asian snooker championship mein shirkat ki thi jab ke Pakistan ki janib se is se qabal Mohammad Yousuf ne 1998 mein yeh title jeeta tha..

Nepal Mein Zalzalay Se Halaak Honay Walon Ki Tadaad 3700 Se Tajawaz Kar Gayi

 Khatmandu: Nepal Mein 2 Roz Qabal Anay Walay Tabah Kun Zalzalay Se Halaak Honay Walon Ki Tadaad 3700 Se Tajawaz Kar Gayi Hai Jab Ke Ab Bhi Hazaron Afraad Imaarton Ke Malbay Taley Dabey Hain Jinhein Nikaalne Ke Liye Imdadi Karwai Jari Hai.

Report ke mutabiq guzishta haftay 7.9 shiddat ke zalzalay se nepal ke 75 mein se 35 azlaa buri terha mutasir hue hain.

Kayi elaqon ke mulk ke deegar hisson se zameeni aur mawaslati raabtey mukammal tor par toot chuke hain.

Is ke ilawa maghribi nepal ke pahari elaqon aur unke nawahi dehaat mein bhi bohat ziyada tabahi hui hai taham dushwaar guzaar raaston aur rabton ki kami ki wajah se wahan ki durust soorat e haal ka andaza nahi ho raha.

Nepal ka dar-al-hakoomat Khatmandu zalzalay se sab se ziyada mutasir howa hai jo is waqt khaima basti mein tabdeel ho chuka hai.

Zalzalay ke baad Aftershocks ka silsila ab bhi jari hai jis ki wajah se logon mein shadeed khauf o hiraas paaya jata hai aur awam khulay aasman taley zindagi guzaarne par majboor hain.

Nepal ki wizarat baraye hungami sorat e haal ke sarbarah Ram Ishwar dangal ke mutabiq ab tak 3700 se zayed laashon ko nikala ja chuka hai jab ke zakhmion ki tadaad 6500 se tajawaz kar chuki hai.

Malbay taley ab bhi hazaron afraad dabey hue hain jis ki wajah se halakaton ki tadaad mazeed barh sakti hai.

Nepal mein guzashta 81 barson mein anay wala ye taaqatwar tareen zalzala tha.
Is se qabal 1934۶ mein anay walay 8.3 shiddat ke zalzalay mein 10 hazaar afraad halaak hue thay..

Data Mehfooz Bananay Ke Liye Ab Paasword Apne Pait Mein Utaar Lain

 San Francisco: Digital Dour Mein Paasword Behad Ahmiyat Rakhtay Hain Lekin Unko Khufia Rakhnay Ki Zaroorat Wahan Aur Zyada Barh Jati Hai Jahan Difai Ya Maliyati Accounts Aur Data Mojood Ho Kyun Kay Un Par Har Waqt Hackers Ki Nazrain Lagi Hoti Hain.

American company ne paasword ko mehfooz bananay ka dilchasp hal talaash kiya hai jis ke tehat paasword ko khaya bhi ja sakta hai aur woh aap ke pait ke andar se aap ko login honay ki sahoolat paish kerega.

Company ke mutabiq is jadeed Capsule mein band aik chhota sa computer maiday ke tezaab se bijli haasil kar kay kaam kerega aur usay insaan aur machine ke milaap ki aik misaal qarar diya ja sakta hai jis mein aap khud apni security ke maalik hotay hain.

American jareeday ke mutabiq pait mein utrney wala ye Capsule us shakhs mein sugar ki satah aur blood pressure bhi note kerega jab ke ye paasword wireless signal ke zariye bahar jayega jis ke baad aap account ki tafseelaat darj karkay sirf chhoo kar login ho sakinge is ke ilawa Skin ke andar kisi chip ko fix kar kay ya Digital Tattoo ke zariye bhi wireless information bheji ja sakti hai.

Company ke mutabiq is jadeed nizaam ko jald mutarif karanay ke liye kaam jari hai jis ke liye ibtidayi tor par aawaz, unglion ke nishanaat, aankhon ke khadd-o-khaal aur chehray ko bhi paasword ke tor par istemaal kiya ja raha hai.

Wazeh rahay ke aksar afraad kahili ki wajah se buhat saada paasword rakhtay hain jis ke baais saal 2014 mein 123456 aur 12345678 sab se aam aur ziyada istemaal honay walay paasword thay…

Karachi Ke Halqa NA-246 Mein Intikhabi Muhim Ka Waqt Khatam Polling Kal 23 April Ko Hogi

 Karachi: Qaumi Assembly Ke Halqa NA-246 Mein Intikhabi Muhim Ka Waqt Khatam Ho Gaya Jab Ke 3 Din Ke Liye Shehar Bhar Mein Motocycle Ki Double Sawari Par Bhi Pabandi Laga Di Gayi Hai.

Report ke mutabiq qaumi assembly ke halqay NA-246 mein 23 April ko honay walay zimni intikhab ke liye intikhabi muhim ka waqt khatam ho gaya hai jis ke baad jalsay, cornor meeting aur rellies par pabandi hogi aur kisi bhi umeed waar ko election muhim chalanay ki ijazat nahi hogi.

Election commission ki janib se tamam polling stations mein belt box pohncha diye gaye hain jab ke polling stations ke andar khufia cameray bhi nasb kar diye gaye hain.

Halqay mein dhandli ki rok thaam ke liye tamam polling stations ke andar aur bahar rangers ahelkaar tainaat honge jab ke zimni intikhab ke douran polling station mein mobile phone istemaal karne par pabandi hogi.

Polling station mein Presiding officer ke ilawa amlay ke kisi bhi shakhs ke liye mobile phone ka istemaal mamnoo hoga aur voters Expired shanakhti card par bhi vote daal sakenge.

Election commission ke ailamiye ke mutabiq polling ke roz halqay mein wifaqi wa sobai mulazmeen ke liye aam tateel hogi aur halqa loadshedding se mustasna hoga.

NA-246 ke zimni intikhab ki dilchasp baat yeh hai ke MQM, PTI aur JI ke Candidates ka vote halqay mein registered hi nahi.

Muttahida Quami Movement ke umeed waar kunwar Naveed Jameel ka vote hyderabad jab ke Tehreek Insaaf ke umeed waar Imran ismael ka vote defence aur Jamaat Islami ke Rashid Naseem ka vote north nazimabad mein registered hai.

Wazeh rahay ke Muttahida Quami Movement ke ticket par muntakhib honay walay rukan qaumi assembly Nabeel Gabool ke istifa ke baad ye nashist khaali hui thi..

Nakhun Per Chipak Kar Khufiya SMS Karne Wala Jadeed Sticker Tayyar

 Bostan: Kabhi Kabhi Apko Intehai Zaroori Pegham Pohanchanay Ke Liye Msg Bhejnay Ki Zaroorat Hoti Hai Lekin Agar Aap Us Waqt Meeting Ya Mehfil Mein Hon To Is Terha Phone Per Masroof Rehna Khilaaf Adab Amal Shumaar Kiya Jata Hai Magar Ab Aap Ki Yeh Mushkil Bhi Aasaan Ho jayegi Kyun Ke Angothay Ke Naakhun Par Nasb Aik Aisa Sticker Tayyar Kar Liya Gaya Hai Jisay Chone Se Aap Ki Email Ya Msg Pahonch Jayega Aur Kisi Ko Iska ilm Bhi Nahi Hoga.

American experts Ne colorful fake nails se mutasir hokar aik Sticker tayyar kar liya hai jis ke neechay bareek circuit mojood hai jo sirf ungli lehraane se hi aik msg tayyar kar sakta hai.

Is ijaad ko NailO ka naam diya gaya hai jisay baaz log jasoosi ka aik aala bhi qarar day rahay hain kyun ke sirf naakhun chone aur ungli lehraane se bhi email aur sms tayyar kiya ja sakta hai jis ka kisi ko ehsas bhi nahi hota jab ke yeh pegham wireless ya bluetooth ke zariye smart phone ya computer par muntaqil hojata hai.

Is jadeed sticker par 4 layers mojood hain jin mein sab se uper color layer,2nd par sensor,3rd par micro chips aur controller aur bluetooth aur 4th battery hai jab ke ye sticker 2 ghantay tak pegham Nashar kar saktha hai.

Is jadeed technology ke zariye chhootey sms aur email paighamaat ko sirf anghutha ghumanay se bheja ja sakta hai.

Experts ke mutabiq is ahem ijaad ka antina banana aik challenge tha taham aur ab battery ko behtar bananay par kaam jari hai jo filhaal sirf 2 ghantay tak kaam kar sakti hai.

Experts ke mutabiq Isay mustaqbil ka remote control bhi qarar diya ja raha hai.

For example ghar mein daakhil hotay hi agar aap naakhun ke sticker par right se left ungli phairen to is se darwaaza khul jaye aur left se right phairnay par ghar ki roshni jalayi ja sakti hai…

News

Karachi
March 2024
M T W T F S S
« Mar    
 123
45678910
11121314151617
18192021222324
25262728293031